Боловсролын яам цэцэрлэг, бага ангийн хичээлийн сургалтын хөтөлбөрийг шинэчлэн боловсруулах, сурах бичгийн эх зохиох, хянах багийг 254 гишүүний бүрэлдэхүүнтэйгээр байгууллаа. “Сургуулийн өмнөх болон ерөнхий боловсролын сургалтын хөтөлбөрийн үзэл баримтлал”-ыг Засгийн газар энэ оны 4 дүгээр сарын 24-нд баталсан. Үүний дагуу уг багийг байгуулжээ.
Энэ баг дараах дэд багаас бүрдэнэ:
- Удирдлага,
- Зохион байгуулалтын баг,
- Сургалтын хөтөлбөр боловсруулах баг,
- Сурах бичиг боловсруулах баг,
- Сургалтын хөтөлбөр, сурах бичиг хянах баг
Төр, хувийн хэвшил, олон нийтийн оролцоог хангаx зарчимд үндэслэн, уг багийг дараах төлөөллөөс бүрдүүлжээ. Үүнд:
- Боловсролын яамны харьяа мэргэжлийн байгууллага 30%,
- Их, дээд сургууль 19%,
- Ерөнхий боловсролын сургууль 25%,
- Сургуулийн өмнөх боловсролын байгууллага 8%,
- Хувийн хэвшил, иргэний нийгмийн байгууллага 13%,
- Олон улсын байгууллага 2%,
- Хувь судлаачид 3%
Багийн гишүүдийн 17% доктор, 53% магистр, 30% нь бакалавр зэрэгтэй байна.
Бага боловсролын сургалтын хөтөлбөр боловсруулах, сурах бичгийн эх зохиохдоо нэг баг хичээл тус бүрээр бүрэн, цогцоор нь боловсруулах аж. Ингэвэл сурах бичиг хоорондын залгамж, уялдаа холбоо сайжирч, сурагчид анги дэвших бүртээ өмнө нь үзсэн хичээлээ гүнзгийрүүлэн судлах болно гэж Боловсролын яам үзэж байна. Сурах бичгийн агуулгыг 10-12 жил тогтвортой байхаар төлөвлөхийг дээрх багт Боловсролын сайд үүрэг болгожээ. Цаашид суурь, бүрэн дунд боловсролын сургалтын хөтөлбөр, сурах бичгийг шинэчлэн боловсруулах багийг байгуулж, сургуулийн өмнөх болон ерөнхий боловсролын сургалтын хөтөлбөрийг залгамж холбоотой, үе шаттайгаар шинэчлэх юм байна.