Шилэн дансны тухай хуулийн хэрэгжилтийн байдал, түүний хүрээнд хийж байгаа болон цаашид Засгийн газраас авч хэрэгжүүлэх арга хэмжээний талаар Улсын Их Хурлын гишүүн З.Нарантуяа Ерөнхий сайдад асуулга тавьсан юм. Тэгвэл Засгийн газрын Хэрэг эрхлэх газраас түүнд хариу өгчээ.
Мэдээлэл дурдагдсанаар Шилэн дансны тухай хуулийн дагуу энэ улиралд нийт 53 төсвийн ерөнхийлөн захирагчийн 4966 төсвийн байгууллага, 84 төслийн нэгж, Засгийн газрын болон орон нутгийн 73 тусгай сан, 510 төрийн өмчит үйлдвэрийн газар, 94 төрийн болон орон нутгийн өмчит хувьцаат компани, төсвийн хөрөнгөөр ажил үйлчилгээ үзүүлж байгаа 758 аж ахуйн нэгж, байгууллага, нийт 6485 байгууллагын 16695 албан тушаалтан нэгдсэн системд 522 мянган удаа хандаж, олон нийтэд мэдээлэл байршуулжээ.
Тэгвэл 53 төсвийн ерөнхийлөн захирагчаас энэ улиралд 33 нь тайлан ирүүлж, 20 төсвийн ерөнхийлөн захирагчийн тайлан ирээгүй байна. Мөн долоо хоногийн дотор шилэн дансанд байршуулах 24 мянган мэдээллээс 16,123 нь хугацаандаа ирж, 6607 нь хугацаа хоцорч, 1140 нь огт мэдээлээгүй аж. Энэ улирлын байдлаар 626 мянга гаруй мэдээлэл байршуулах ёстойгоос 79.1 хувьтай яваа аж.
Т.Бэх
