Үндсэн хуулийн цэцэд иргэн Б.Төртүвшин, түүний өмгөөлөгч Ц.Монгол нар Улсын Дээд шүүхийн ерөнхий шүүгч Д.Ганзоригийг Үндсэн хууль зөрчсөн хэмээн гомдол гаргаж, улмаар Цэц Их суудлын хуралдаанаа өнөөдөр өглөө 9.30-д эхлүүлсэн.
Цэцийн хурлыг Ш.Солонго даргалж, Г.Туулхүү илтгэж, бүрэлдэхүүнд нь Г.Баясгалан, Д.Гангабаатар, Ц.Нанзаддорж, Д.Одбаяр, Б.Буяндэлгэр нар багтсан. Бүрэлдэхүүний хувьд УИХ-аас нэр дэвшсэн 3, Ерөнхийлөгчөөс нэр дэвшүүлсэн 3, Дээд шүүхээс нэр дэвшүүлсэн 1 гишүүн байсан гэсэн үг.
Улсын Дээд шүүхийн ерөнхий шүүгч Д.Ганзоригийг итгэмжлэн төлөөлж тус шүүхийн Захиргааны хэргийн танхимын шүүгч Д.Мөнхтуяа иржээ. Оролцогчид Цэцийн гишүүдийн хэн нэгнээс татгалзах санал гаргаагүй тул дэг танилцуулснаар эхлэв.
Энэ үеэр өмгөөлөгч Ц.Монгол "Гэрчээр хүн оролцуулах хүсэлтэй байна. УИХ-ын гишүүн Б.Энхбаярыг гэрчээр оролцуулах хүсэлтэй байна" гэхэд хурал даргалагч Ш.Солонго хүсэлтийг эс болгоов.
Илтгэгч гишүүн Г.Туулхүүгийн илтгэснээр бол БГД-ийн 7-р хорооны иргэн Б.Төртүвшин нь Мөнхноён суварга ХХК-ийн нэхэмжлэлтэй БГД-ийн Татварын хэлтсийн татварын байцаагч нарт холбогдох хэргийн асуудлаар Улсын Дээд шүүхийн ерөнхий шүүгчид гомдол гаргасан юм байна. Тэгэхэд Ерөнхий шүүгч бус Ерөнхий шүүгчийн ажлын албанаас хариулт өгсөн нь шүүн таслах ажиллагаанд оролцох эрхгүй захиргааны ажилтныг шүүн таслах ажилд оролцуулсан буюу шүүхээс гадуур шүүх байгуулсан хууль зөрчсөн асуудал гэж Цэцэд гомдол гаргажээ. Гомдол гаргагчид өөр хэд хэдэн хуулийн заалт эшлэсэн.
Цэцийн дарга Н.Чинбатын тэтгэврийн насанд хүрсэнтэй холбоотойгоор тус албан тушаалд нэр дэвшүүлэх орныг нөхөхөөр Улсын Дээд шүүх зар түгээсэн нь Үндсэн хууль зөрчсөн гэх гомдлоос өөр асуудлыг өнөөдөр хэлэлцэж байгаа юм байна. Тэрхүү гомдлыг хэзээ хэлэлцэх нь тодорхойгүй байгаа аж. Харин өнөөдрийн Их суудлын хуралдаанаар болон Н.Чинбат гавьяаттай холбоотой гомдлоор хэрэв Ерөнхий шүүгчийг Үндсэн хууль зөрчсөн гэх шийдвэр гарвал эгүүлэн татах, огцруулах асуудлаар Цэцээс ямар нэгэн шийдвэр гарахгүй юм.
Ерөнхий шүүгчийн итгэмжлэгдсэн төлөөлөгчөөр Д.Мөнхтуяа шүүгч нотлох баримт шинжлэх судлуулах, материалд тусгуулахаар байгууллагын журам, дүрэм, акт зэргийг нарийн бичгийн даргад хүлээлгэн өгсөн. Энэ явцын дараа хурал даргалагч Ш.Солонго хурлын танхимд байсан хүмүүсийг гарахыг тушаав. Гарахаас татгалзвал албадлага хэрэглэхийг сануулав. Тэрээр "Хувь хүний асуудал ярих гэж байгаа учраас" гэсэн билээ.
Харин гомдол гаргагчийн туршлагатай өмгөөлөгч Ц.Монгол "Энд хувь хүний асуудал огт яригдахгүй тул нээлттэй явуулах саналтай байна" гэсэн юм. Мөн шүүгч Д.Мөнхтуяа ийм санал гаргасан боловч хурал даргалагч Ш.Солонго хүлээн авсангүй биднийг гаргалаа.
Үндсэн хуулийн цэц нь Монголын аль ч шүүхээс саруул танхимтай. Гэвч өнөө хэр нь олон нийтийг мэдээлэл авах эрхийг хүндэтгэхгүйгээр үл барам, хаалттай байгууллага болон хувирсан. Тус байгууллага цар тахлын үед хурлаа цөөлснөөс гадна сэтгүүлч, судлаачдын байрандаа нэвтрүүлэн бага, дунд, их суудлын хуралдааныг ажиглах боломжоор хангахаа больсон юм.
Үндсэн хуулийн цэцийн Их суудлын хуралдаанаас гаргасан шийдвэрийг дөнгөж сая /17:30/-д Г.Туулхүү илтгэгч танилцууллаа. Товчхондоо, Ерөнхий шүүгчид холбогдуулан гаргасан иргэний гомдлыг хэрэгсэхгүй болгож, маргаан үүсгэсэн шийдвэрийг хүчингүй болгов.
Г.Улсболд
