“Нүүрсний хулгай” гэх сэдэв хоёр парламент дамнан яригдаж, энэ парламентын үед УИХ-аас Хянан шалгах түр хороог байгуулсан. Түр хорооны албан нэр нь “Хилийн боомтуудаар ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч байгаа хүндрэлийг шалган тогтоох түр хороо”.
Түр хороог УИХ-ын гишүүн Г.Ганболд даргалж, Ц.Анандбазар, Ш.Адьшаа, Г.Мөнхцэцэг, С.Ганбаатар, Н.Ганибал, Т.Энхтүвшин, Б.Жавхлан, С.Бямбацогт, Б.Бейсен, Н.Наранбаатар, Б.Баттөмөр нарын гишүүд бүрдүүлдэг.
Харин хянан шалгагчаар цагдаад 37, тэр дундаа эрүүгийн цагдаагийн албанд 20 жил ажилласан Т.Оюунбаатар, цагдаад 24 жил ажилласан Д.Мягмарсүрэн, цагдаад 16 жил ажилласан М.Батмөнх нарыг томилсноос гадна ТӨХ-ны дарга, Цэцийн гишүүн байсан Д.Сугар, Өмнөговь аймгийн Авто тээвэрчдийн холбооны гүйцэтгэх захирал Н.Адьяасүрэн нарыг томилсныг хурлын тэмдэглэлээс үзэж болно.
Харин өчигдөр болсон хурлаас Д.Сугарыг хянан шалгагчийн ажлаас өөрийнх нь хүсэлтээр чөлөөлж, оронд нь цагдаад 35 жил ажилласан Б.Мөнхбатыг томилсон юм. “Нүүрсний хулгайн” гэх Түр хороо өнгөрсөн хавар байгуулагдах үеэр Д.Сугарыг Хөтөлийн, Дарханы төмөрлөгийн үйлдвэрийн хувьчлалын асуудалд буюу тэр үед Төрийн өмчийн хорооны дарга байсан ажил үүргийн шалтгаанаар нь яллагдагчаар татсан гэх мэдээлэл хэвлэлээр гарч байв. Харин Д.Сугар “ар гэрийн шалтгаанаар” дээрх түр хорооны хянан шалгагчийн ажлаа өгсөн юм. Өвөрхангайгаас сонгогдсон Г.Ганболд Түр хорооны даргын хувьд хянан шалгагчаар Өвөрхангайгаас УИХ-д сонгогдож байсан Д.Сугарыг танилцуулж, санал хураалгахад УИХ-ын гишүүн Ц.Анандбазар, "Д.Сугар дарга хуулийн том хүн, туршлагатай хүн" хэмээн дэмжсэн байдаг.
УИХ-ын Хяналт шалгалтын тухай хуульд зааснаар хянан шалгагч нь Түр хорооноос баталсан удирдамжийн хүрээнд:
-шаардлагатай нотлох баримтыг бүрдүүлэх;
-нотлох баримт гаргаж өгөхийг шаардах;
-тухайн асуудалд холбогдох этгээдээс тайлбар авах;
-нөхцөл байдалтай газар дээр нь танилцах, тэмдэглэл үйлдэх;
-бичиг баримтад дүн шинжилгээ хийх эрхтэй этгээд юм.
Г.Болд
