Үндсэн хуулийн цэцээс 2019 оны Үндсэн хуулийн нэмэлт өөрчлөлтийн "давхар дээл"-ний хязгаарыг унагаасны дараагаар УИХ ээлжит бус чуулган зарлан холбогдох хуулиудыг өөрчилж, дараагаар нь Л.Оюун-Эрдэнэ Засгийн газрынхаа гишүүдийг сольсон.
Ээлжит бус чуулганы үеэр 2022 онд багтаан ҮХНӨ-ийн төслийг боловсруулж, парламентад өргөн барихыг Засгийн газарт УИХ-ын тогтоолоор үүрэг болгосон юм. Энэ дагуу Төрийн байгуулалтын байнгын хорооны дарга Ж.Мөнхбатаар ахлуулсан ажлын хэсэг гарч, дэд ажлын хэсгээ томилсон.
Гэсэн хэдий боловч Засгийн газраас 2022 онд багтаан ҮХНӨ-ийн төслийг бэлэн болгон УИХ-д өргөн барьж амжихгүй гэсэн мэдээлэл Төрийн ордонд тараад байна. Үнэхээр амжихгүй юу, шаардлагагүй гэж үзсэн үү, ҮХЦ-д 2019 оны ҮХНӨ-ийг өгөх замаар унагахаар замаар хуулиудыг өөрчлөх гэж байна уу гэдэгт ажлын хэсгийнхэн мэдээлэл өгөх шаардлагатай болжээ.
УИХ-ын тогтоолоор бол парламентын сонгуулийн тогтолцоо, парламентын гишүүдийн тоог тодорхой болгох үндсэн хоёр чиглэлийг өгсөн байдаг. Харин Ерөнхийлөгчийг иргэдээс сонгох уу, парламентаас сонгох уу гэдэг дээр чиглэл өгөөгүй юм. 2019 оны ҮХНӨ-ийг дагалдуулан Ерөнхийлөгчийн тухай хуулийг өөрчлөх шаардлагатай жагсаалтад оруулсан боловч өнөө хэр Засгийн газар ч тэр, УИХ ч тэр эс үйлдэл гарган хойш тавьсаар байгаа билээ.
Г.Улсболд
