Ирланд, Норвеги, Испани улсууд тавдугаар сарын 28-наас эхлэн Палестиныг албан ёсоор тусгаар улс хэмээн хүлээн зөвшөөрөхөө зарлалаа. Норвеги улсын Ерөнхий сайд Йонас Гар Сторе лхагва гарагт хийсэн хэвлэлийн бага хурлын үеэрээ уг шийдвэрийг мэдэгдсэн байна. Тэрээр "Энэ бол Ойрхи Дорнодод тогтвортой энх тайвныг авчрах цорын ганц шийдэл болох Израиль, Палестин улсууд энх тайвнаар зэрэгцэн оршин тогтноход оруулсан хөрөнгө оруулалт" гэж хэлэв. Норвеги улс ийн мэдэгдсэний дараа Ирланд, Испани улс "Энэ бол Израилийн эсрэг ч биш, Хамасын талд ч биш, харин энх тайвныг дэмжсэн шийдвэр гэж үзэж байна" гэлээ.
Израил уг шийдвэрийг буруушааж "Энэ алхам нь бүс нутагт тогтворгүй байдлыг нэмэгдүүлнэ" гэж анхааруулаад, дээрх гурван улсад суугаа Элчин сайдуудаа эргүүлэн татжээ.
Ирландын Гадаад хэргийн сайд Мишеал Мартин “Өнөөдөр бид Палестин болон Израилийн ард түмний аюулгүй байдал, нэр төр, эрх тэгш байх эрхийг хоёрдмол утгагүй дэмжиж байгаагаа илэрхийлье" гэв. Тус улсын Ерөнхий сайд Саймон Харрис "Хамас бол Палестины ард түмэн биш. Энх тайван ирээдүйг бий болгоход туслах зорилгоор өнөөдрийн Палестиныг хүлээн зөвшөөрөх шийдвэр гаргасан" гэж мэдэгджээ.
