Уильям Лай Тайванийн Ерөнхийлөгчийн тангараг өргөснөөс хойш гуравхан хоногийн дараа Хятад улс Тайванийг тойрон цэргийн сургуулилалт хийж эхэллээ. Хятадын Ардын Чөлөөлөх Армийн хэвлэлийн төлөөлөгч Ли Си уг сургуулилалтыг "Салан тусгаарлах үзлийн төлөөх хүчтэй шийтгэл" гэж хэллээ. Өнөө өглөө эхэлсэн сургуулилалт Тайванийн гол арлын эргэн тойронд, тэр дундаа баруун талаараа Тайванийн хоолой, Тайбэйгийн хяналтад байдаг Кинмэн, Мацу, Вукиу, Дун-ин арлын эргэн тойронд болж байна.
Бээжингийн энэ үйлдлийг Тайванийн Батлан хамгаалах яам буруушааж, өдөөн хатгалга гэж үзжээ. Хятадын тал "Энэ нь Тайванийн тусгаар тогтнолын төлөөх салан тусгаарлах үйлдлүүдийн чанга шийтгэл бөгөөд гадаадын хүчин хөндлөнгөөс оролцох, өдөөн хатгах үйлдлээс сэргийлэх хатуу анхааруулга" гэж онцлон мэдэгдэв.
Хятад өөрөө өөрийгөө удирддаг Тайванийг улсынхаа нутаг дэвсгэрийн нэг хэсэг хэмээн тунхагласаар ирсэн ч Тайвань үүнийг хэзээ ч хүлээн зөвшөөрдөггүй. Ерөнхийлөгч Уильям Лай даваа гарагт тангараг өргөх ёслолынхоо үеэр, Тайваньд заналхийлэхээ зогсоохыг Хятадад уриалсан юм.
“Сүүлийн жилүүдэд Хятадын нисэх онгоц, хөлөг онгоцууд тасралтгүй дарамталж байгаа нь Дэлхийн энх тайван, тогтвортой байдалд ихээхэн хохирол учруулж байна. Энэхүү цэргийн сургуулилалт нь Тайванийн хоолойн энх тайван, тогтвортой байдлыг хангахад тус болж чадахгүйгээс гадна Хятадын армийн түрэмгий милитарист сэтгэлгээг онцолж байна" гэж Тайванийн Батлан хамгаалах яам мэдэгдлээ.
