Дархан Монгол ногоон нэгдэл ТББ-ын тэргүүн Дашдэлэгийн Дашням Монгол Улсын Ерөнхий сайдын зөвлөх болжээ.
Тэрээр 2021 оны 12 дугаар сард Худалдааны салбарын 100 жилийн ойн баярт, 2022 оны 4 дүгээр сард Тариаланчдын улсын зөвлөгөөнд Ерөнхий сайдын илгээлтийг уншиж, гардуулжээ.
Д.Дашнямын талаар хуулийн этгээдийн улсын бүртгэлээс шүүвэл тэрээр “Манангийн эсрэг түмний нэгдэл” ТББ-ын тэргүүн, “Үндэсний аюулгүй байдал хөгжүүлэх судалгааны төв” ТББ-ын тэргүүн, “Сонгогчдын хяналт, боловсрол судалгааны төв” ТББ-ын тэргүүн, Ногоон аврал сангийн тэргүүн харагдаж байна. Д.Дашнямын өөрийнх нь захирлаар ажилладаг Юнайтед продакшн ХХК, Маршал гардианс эжэнси ХХК дүрс бичлэгийн зэрэг чиглэлээр үйл ажиллагаа явуулдаг гэж бүртгүүлжээ.
Д.Дашням DMNN фэйсбүүк хуудсыг олон жил ажиллуулж байгаа бөгөөд улс төрийн агуулгатай зурагт хуудас нийтэлдгээр нь хүмүүс гадарлах байх. Мөн тэрээр УИХ-ын дэд дарга Т.Аюурсайхан, Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатар, ШИНЭН-ын Ж.Батзандан, Л.Болд нартай хамт МАНАН дэглэмийн эсрэг ард түмний хөдөлгөөн гэх жагсаалыг зохион байгуулалцаж, тухайн үеийн УИХ-ын дарга М.Энхболдыг огцруулахыг шаардаж улмаар тэднийг даган өрөөнд нь орж шуугиан дэгдээж байв. Мөн “Нэхүүл” гэх ТББ-ын үйл ажиллагаа Д.Дашнямтай холбогддог.
Ерөнхий сайдын зөвлөхийн DMNN хуудсанд сүүлийн үед Ерөнхийлөгч асан Х.Баттулга руу чиглэсэн зурагт хуудас, мэдээллүүд түлхүү орж байгааг харж болохоор байна.