Нам, төрийн зүтгэлтнүүд өөрсдөө болон хүүхдүүдээ Боловсролын зээлийн сангийн мөнгөөр гадаадад сургадаг байсан нь тодорхой болсон. Мэдээлэлд ойр хэсэг нь жирийн айлын хүүхдүүдийн урдуур дайрч, боломжийг нь хулгайлдаг байжээ. Ийм шүүмжлэл ид асах үеэр “Жирийн ардын хүүхэд, ажилгүй нэгэн” байхдаа Боловсролын зээлийн сангийн мөнгөөр Канадад сурсан гэж Г.Дамдинням гишүүн тайлбарласан нь Олон улсын театрын өдрөөр байж таарлаа. Чанартай боловсрол эзэмшээд, сурсан мэдсэнээ УИХ-ын гишүүний ажилдаа гаргаж чадаж байгаа бол барав. Тэр зэргийн хаялага Монгол төрд, тэрийг өнгөрөөх зан монголчуудад байгаа. Харин худлаа ярьж, хүмүүсийг хуурч байгаа чинь өөдгүй явдал шүү Г.Дамдинням аа. Таныг гишүүн болоход цагдаа танихгүй зогсоосон байж болно. Харин сэтгүүлчид юу болсныг үргэлж ярилцаж, сануулж байдаг.
“Хувьсгалт” Г.Дамдинням
Г.Дамдинням 2003 онд МУБИС-ийн гуравдугаар курсын оюутан байхдаа Оюутны холбооныхоо даргын тамгыг хичээлийн Ё байрны урд гардсан. Энэ квотоороо МОХ-ны удирдах зөвлөлд орсон. Элдвийг хийсэн. Сургуулиа төгсөөд жилийн дараа буюу 2005 онд тухайн үеийн эрх баригч МАХН-д гишүүнээр элссэн. МАХН-ын дэргэдэх МАСОХ /саяхны НАМОХ/-ны шилдэг оюутны шагналыг Намбарын Энхбаяраас гардав.
2007 онд МАСОХ-ны дэд ерөнхийлөгч болсон байлаа. Тэр МАХН-ын VII Бага хуралд оролцож, үг хэлэв. О.Магнай, Ж.Батзандан нарыг “Эрүүл нийгэм, иргэний хөдөлгөөн” байгуулаад Сүхбаатарын талбай дээр ид манаргаж байхад МАХН-ын дарга Н.Энхбаярын зараалаар “Эрүүл нийгэм, иргэний хөдөлгөөнийг эрүүлжүүлье” гэдэг хөдөлгөөний тэргүүн байсан юм шүү дээ. Үүнийг тодруулаад байгаагийн учир нь, Г.Дамдинням Канадын Бритиш Колумбын их сургуульд явахдаа хэн ч биш байгаагүй.
“Худалч” Г.Дамдинням
Намын гишүүн, намын залуучуудын байгууллагын дарга юм чинь сонгуулийн ажилд дүү нараа дагуулаад оролцсон байж таарна. МАХН нэрээ сольж МАН болоогүй байсан цаг. Г.Дамдиннямыг Байгаль орчны сайд Г.Шийлэгдамба агсан дэргэдээ хэсэг ажиллуулав. Дараа нь Ё.Отгонбаяр Боловсролын сайд байхдаа хэсэг ажиллуулав. Хоёуланд нь нэг жил зөвлөхийн орон тоон дээр байсан санагдаж байна. Ёндонгийн Отгонбаяр өөрийн зөвлөхөө ШУТИС-ийн Санхүү, хангамж хариуцсан проректор болгов.
Ингээд 2012 оны сонгуульд АН ялж, МАН ялагдав. Боловсролын сайдаар Лу.Гантөмөрийг томилов. Үүнтэй зэрэгцээд Ё.Отгонбаяр, Г.Дамдинням нарын тухай албан тушаалын гэмт хэргийн мэдээ хэвлэлд гарах болов. Г.Дамдинням 2013 онд ажлаа өгөөд БЗС-ийн зээлээр Канадыг зорилоо. Өргөдлийг өөрөөр нь өгүүлдэг Монголын улс төрийн “соёл” одоо ч бий. Албан тушаалыг нь авсан Л.Гантөмөрийн үед зээл нь шийдэгдсэн тухай Г.Дамдинням өөрөө дурссан байна лээ. Хариутай бол бариутай л байдаг.
Ингээд үзэхэд Г.Дамдинням гишүүн зээл нь бүтэх үед энгийн ардын хүү, ажилгүй нэгэн байгаагүй. Харин ч нам, төрийн зүтгэлтэн, мэдээлэлд ойр нэгэн байсан нь намтраар нь нотлогдож байна. Түүнийг зээлд хамрагдаад, боловсрол олсныг нь буруутгаагүй ээ. Сандарч цочихдоо худлаа хэлснийг нь л санууллаа.
Канадын мундаг боловсрол эзэмшсэн хүн 4 жил УИХ-д суухдаа санаачилж, батлуулсан байтугай олигтой санал гаргасан хуульгүй Дарханы замаа л яриад тойргийн улстөр хийж байгаа нь даанч харамсалтай яа. Боловсролын зээлийн санг байгуулсан эцсийн зорилго иймэрхүү чадалтай УИХ-ын гишүүн бэлдэх явдал биш шүү дээ.
Г.Улсболд