Монголын Хуульчдын холбоо V их хурлаа 12 сарын 10-нд хийх гэж байгаа. Холбоонд бүртгэлтэй 5383 хуульчийг төлөөлж 538 төлөөлөгч их хуралд оролцож, ерөнхийлөгчөө сонгох бөгөөд өнөөдрөөс уг сонгуульт ажилд нэр дэвших хүмүүсийн бүртгэл эхэлжээ. Холбооны Ерөнхийлөгч Б.Өнөмөнх 2 жил ажилласан бөгөөд улиран сонгогдохгүй. Цар тахлын дэглэмийн үед олныг хамруулсан хурал хийх боломжгүй, Хуульчийн эрх зүйн байдлын тухай хууль батлагдаагүй зэрэг шалтгаан Хуульчдын их хурлыг хойшлуулахад хүргэсэн тухай тэрээр тайлбарлаж байв.
Одоогийн байдлаар Хуульчдын холбооны ерөнхийлөгчид хуульч Л.Галбаатар, өмгөөлөгч Ш.Алтангадас, Ч.Өнөржаргал, Г.Батзаяа, Монголын олон улсын арбитрын ерөнхий нарийн бичгийн дарга М.Шинэбаяр, МУИС-ийн Хууль зүйн сургуулийн багш М.Мөнхбат нар нэрээ дэвшүүлэхээр байна.
Г.Батзаяа хуульч Их засаг их сургуулийн төгсөгчдийн холбооны тэргүүн бол бусад нэр дэвшигч МУИС төгсөгчид байна.
Хуульчдын салбар хорооноосоо Ч.Өнөржаргал 7 дугаар байрт, М.Мөнхбат 18 дугаарт байрт, Г.Батзаяа 21 дүгээр байрт, Ш.Алтангадас 31 дүгээр байрт, М.Шинэбаяр 41 дүгээр байрт жагсаж төлөөлөгчөөр сонгогджээ. Харин хуульч Л.Галбаатар гаднаас нэр дэвших юм байна. Дээрх нэр дэвшигчийн бүртгэл өнөөдөр эхэлж байгаа тул өрсөлдөгчид нэмэгдэх магадлалтай. Бас аль ч сонгуульд байдаг шиг зааланд үгээ хэлээд, нэрээ татах хүмүүс ч энэ дунд байна.
Хуульчдын холбооны зөвлөлд салбар хорооны 50 хүн тутамд 1 хүнийг зөвлөлийн гишүүнээр ажиллуулдаг байсан. Ингээд 40 орчим хүн холбооны зөвлөлд Их хурлаас баталгааждаг.
Харин 5383 хуульчийн 10 хувь болсон 538 хуульчид эзлэх салбарын квот энэ удаагийн Хуульчдын их хуралд тэнцүү зарчмаар тогтоогджээ. Тодруулбал, өмнө нь нийт төлөөлөгчийн 40 хувь нь өмгөөлөгч, 20 хувь нь шүүгч, 20 хувь нь прокурор, 20 хувь нь бусад хуульч байхаар тогтоосон байсан бол энэ удаагийн 538 хуульчийг 108-аар тэнцүүлсэн бөгөөд энд нотариатчдын 108 квот нэмэгдсэнээрээ онцлогтой байна.
Г.Улсболд