МАН-ын Удирдах зөвлөлөөс Г.Занданшатарыг Ерөнхий сайдад нэр дэвшүүлж, Бага хуралд оруулж хэлэлцүүлэх гэж байна. МАН-ын бага хурлын ирц 50-иас дээш хувьдаа хүрч хуралдаан эхэлж байгааг албаны улсын зүгээс мэдэгдлээ. МАН-ын бага хурал нь 479 гишүүнтэй бөгөөд 50 хувиас дээш ирц бүрдэхэд хурлыг эхэлдэг. УЗ-ийн 45 гишүүний саналаар Ерөнхий сайдад нэр дэвшүүлсэн Гомбожавын Занданшатар нь одоогоор Ерөнхийлөгчийн тамгын газрын даргын албыг хашдаг. Хүнс Хөдөө аж ахуйн дэд сайд, Гадаад харилцааны сайд, МАН-ын Ерөнхий нарийн бичгийн дарга, Засгийн газрын Хэрэг эрхлэх газрын даргын албыг хашиж байснаас гадна УИХ-д 4 ч удаа сонгогдож ажиллаж байсан, УИХ-ын даргаар ажиллаж байсан туршлагатай улс төрч. МАН-аас Ерөнхий сайдад яригдаж байгаа бусад нэр дэвшигчдээсээ олон үзүүлэлтээр илүү санал авч сонгогдох магадлалтай улс төрч гэдгээрээ ялгарна.