Зуны дэлгэр цагтай давхцаад энд тэнд урлагийн тоглолтууд, хөгжмийн наадмууд ар араасаа цуврах шиг болж байна. Угаасаа зуны дэлгэр цагт л монголчууд том жижиггүй шавайгаа ханатал амарч зугаалдаг даа. Өөр ч арга байхгүй дээ. Бусад үед нь цаг агаар нь ямар билээ. Тэгээд ч зун олж авсан энэ эрчим хүчээрээ хахир хатуу цагийг туулдаг хойно. Хамтлагуудын тоглолт, хөгжмийн наадмууд гоё болдог болжээ. Үзэгч сонсогчийн хувиар оролцдог залуус ч нэг үеэ бодвол харьцангуй соёлтой күүл болсон байна. Гэхдээ бас нэг асуудал байгаа нь тийм арга хэмжээнүүд дээр хутга, бахь, алх зэргийг авч очоод байдаг нь яг ямар учир вэ. Одоо бүүр тэр нь томроод сүх хүртэл нэгжлэгээр гарч ирж. Эрхбиш ороход нь хамгаалалтынхан нэгжиж байгаа болохоор илрээд байгаа бололтой. Хэрэв энэ бүхнийг аваад орлоо гэж бодоход яг яах зорилготой байна вэ. Ямар нэгэн муу зүйл тохиолдоод бусадтай сайдаж муудвал шууд хүйтэн зэвсгээр нэгэн рүүгээ дайрахад бэлэн байна гэсэн үг үү. Тиймээс хойшдоо биеэс нь ямар нэгэн байдлаар зэвсгийн чанартай зүйл гарсан бол тодорхой хугацаанд саатуулдаг, тухайн арга хэмжээ рүү нэвтрэх эрхийг нь шууд хасдаг болох хэрэгтэй болжээ. Хутга сүх агсаад очиж байгаа хүн ямар ч авир гаргаж, бусдад ямар ч хохирол учруулж болно. Нийтийн эрх ашгийг хүндлээгүй хүнд авах арга хэмжээг нь авдаг байх хэрэгтэй болжээ.

Бас нэг асуудал. Тэр бол мэдээж бие засах газрын асуудал байна аа. “Play time” хөгжмийн наадмын 00-н бичлэг сая хэдэн өдөр соошлоор явлаа. Арай л заваан. Заваан гэхэд ч багадна. 00-р үйлчлүүлж байгаа хүмүүст асуудал байгаа хэдий ч зохион байгуулагчид энэ тал дээр сэтгэл гаргахгүй байна аа. Хүний анхдагч хэрэгцээг үл ойшоож байх шиг. Ариун цэврийн газар нь тэр олон хүнд хэтэрхий цөөдсөн, хэт урт дарааллаас залхсан хүмүүс гадуур дотуур “асуудлаа” шийдэх гээд олон сөрөг зүйл бий болжээ. Тиймээс энэ мэт томоохон арга хэмжээг зохион байгуулахдаа хамгийн түрүүнд 00-н хүртээмжийг анхаардаг болцгооё оо. Бид дундад зуунд биш хөгжил дэвшлийн оргил цаг үед амьдарч байгаа шүү дээ.

Я.Баярбаатар