Халхын анхдугаар Богд Өндөр гэгээн Занабазарын мэлмий гийсний 390 жилийн Бат оршил өргөх даншиг наадам Өврийн хангайн Есөнзүйлийн хөндийд дэлгэр сайхан боллоо. Одоогоос 20 жилийн тэртээ 2005 онд Өндөр гэгээний наадмыг сурвалжлахаар халуун голомтыг нь зорьж билээ. Тэр жилийн зуны сайхныг яана. Орхоны номин ногоон хөндийг сэтгэл бахдан харж, Эрдэнэзуугийн 108 суваргад бишрэлтэйгээр мөргөж явлаа.
Наадамд зодоглохоор ирсэн, тэр жил(улсын наадам)-ийн түрүү бөх Өсөхөө аваргатай зураг татуулж, Өндөр гэгээний наадмын түрүү азарга Макс Ганбаагийн жигүүр хулын уяан дээр очиж, алтан ургийн Автай сайн хааны суварга, Ханджамц хатны суварга, Өгөдэй хааны Түмэн амгалант ордны туурийг үзэн нүд баясаж мөн ч гоё наадаж билээ. 1995 онд 360 жилийнх ойг хийхэд гол даамал нь Нацагийн Жанцанноров гуай байсан гэдэг. “Халмагхан хоёр залуу мотоцикльтой хоорондоо мөргөлдсөнийг эс тооцвол өөр ямар ч хэрэг зөрчил гараагүй. Ард түмэн чинь сүслэх юмандаа сүсэлдэг юм билээ. Өндөр гэгээндээ сүсэлсэн шүү” гэж хэлж байсан. Наадмын нээлтэд Мөөеө аваргад их дэлтэй хул хонгор азарга унуулж туг бариулаад мордуулжээ. Гэтэл дуу хөгжим, олныг шуугианаас болсон уу азарга аваргыг булгиад шидчихсэн гэдэг.
Наадамчид уулга алдан шуугиад явчихаж. Их аварга хоёр хөл дээрээ буугаад зогсохгүй жолооноосоо зоримог гэгч татан сэвхийтэл мордоод тугаа барьж, талбайг гурав тойрон ороод ирсэн гэдэг. Энэ л хийморь сүлдийг Өндөр гэгээний наадамд өөрийн эрхгүй боддог. Өнөө жилийнх нь их ойд Э.Батмагнай анх удаа арслан цолтойгоор цолоо дуудуулж, ам авч байна. Зулын гурван гэгээн гэж Өндөр гэгээн, Ламын гэгээн, Заяа гэгээнийг хэлдэг юм гэсэн. Юм учиртай л байх. Энэ мэт анхдугаар их Богдынхоо наадамд түмэн олноороо цэнгэн баяслаа. Өндөр гэгээний хосгүй их билэг оюунд сөгдөн мөргөнөм.
Н.Гантулга