Орос, Америкийн сансар судлалын агентлагууд Олон Улсын Сансрын Станцын хамтын ажиллагаагаа 2028 он хүртэл сунгахаар тохиролцсон талаар ОХУ-ын сансар судлалын Роскосмос агентлагийн ерөнхий захирал Дмитрий Баканов пүрэв гарагт мэдэгджээ.
Тэрээр хамтын ажиллагааны асуудлаар энэ долоо хоногийн эхээр АНУ-д айлчилж, NASA-гийн гүйцэтгэх захирал Шон Даффи-тай уулзалт хийсэн бөгөөд энэ нь 2018 оноос хойш хоёр улсын сансар судлалын агентлагийн тэргүүнүүд уулзсан анхны тохиолдол болсон байна.
Роскосмосын ерөнхий захирал мөн АНУ-д ажиллах хугацаандаа SpaceX компанийн Crew Dragon хөлгөөр хөөрөх гэж буй NASA-гийн 11-р багийн гишүүдтэй, тус багт багтсан нутаг нэгт сансрын нисгэгч Олег Платоновтой уулзах юм байна.
Дмитрий Баканов ТАСС агентлагт өгсөн ярилцлагадаа уулзалт амжилттай явагдсаныг хэлж, талууд 2028 он хүртэл ОУСС-ын төсөлд хамтран ажиллахаар тохиролцсоноос гадна мөн 2030 оноос өмнө ОУСС-ыг дэлхийн тойрог замаас гаргах асуудал дээр мөн хамтран ажиллах болно гэдгийг хэлсэн байна.
ОХУ 2022 оны 2-р сард Украинд түрэмгийлэн халдсанаас хойш тус улсын эсрэг авсан олон хориг арга хэмжээний хүрээнд барууны улс орнууд Роскосмостой хамтын ажиллагаагаа зогсоосон. Украины дайн эхэлснээс хойш харилцаа муудсан АНУ, ОХУ-ын хооронд хамтын ажиллагаа үргэлжилсээр буй цөөн салбарын нэг бол сансар судлал юм.
Олон Улсын Сансрын Станцын төслийг Орос, Америк, Европ, Япон хамтран эхлүүлж байсан бөгөөд сансар дахь станцын угсралтын ажил 1998 онд эхэлж байсан түүхтэй.
Анх төлөвлөсний дагуу ОУСС 2024 он хүртэл ажиллах ёстой байсан ч NASA-гийн зүгээс 2030 он хүртэл ажиллах боломжтой гэсэн байр суурийг илэрхийлж байгаа юм.