Японы Үндэсний цагдаагийн агентлагийн зүгээс энэ оны эхний хагаст тус улсад үйлдэгдсэн утасны залилан болон олон нийтийн сүлжээнд үйлдэгдсэн луйврын хэргийн хохирлын хэмжээ 59.7 тэрбум иенд хүрч, шинэ дээд хэмжээ тогтоосон тухай мэдэгджээ.

2025 оны эхний 6 сарын хугацаанд Японы иргэд утасны залилан, сошиал луйврын улмаас алдсан дээрх хэмжээ нь 400 сая орчим ам.доллартай тэнцэж байгаа ба өнгөрсөн оны мөн үеийн үзүүлэлттэй харьцуулахад 2.6 дахин их байгаа ажээ.

Түүнчлэн энэ төрлийн залилангийн хэргийг бүртгэж эхэлсэн 2004 оноос хойшхи оны эхний хагас жилийн хугацааны хамгийн өндөр хохирлын хэмжээг тогтоосон байна.

Мөн энэ оны эхний 6 сарын хугацаанд дээрх төрлийн залилан луйврын 13,213 хэрэг бүртгэгдсэн нь хэрэг бүртгэлийн шинэ дээд хэмжээг тогтоожээ. 

Японы Үндэсний цагдаагийн агентлагаас мөн гэмт хэрэгтнүүд өөрсдийгөө цагдаа хэмээн жүжиглэж, хохирогчдод цагдаагийн хуурамч үнэмлэх, нэвтрэх болон баривчлах тушаал зэргийг үзүүлж, тэднийг өөрсдийнхөө данс руу мөнгө шилжүүлэхийг шаардаж буй хэргийн тоо огцом өсөн нэмэгдэж байгааг иргэддээ анхаарууллаа. Энэ төрлийн залилангийн хэрэг оны эхний хагас жилд бүртгэгдсэн нийт залилангийн хэргийн 65%-ийг эзэлжээ.

Статистик тоон мэдээллээс үзэхэд энэ төрлийн залилангийн хэргийн дийлэнх хохирогчид нь залуучууд буюу 20-30 насны хүмүүс ажээ. Тиймээс Японы цагдаагийн байгууллагаас иргэддээ хандан цагдаагийн албан хаагчид хэзээ ч иргэдээс төлбөр нэхэмжилж, дансаар явуулахыг шаарддаггүй болохыг анхааруулан захьсан байна.