Тайланд, Камбож улсууд хилийн орчмын газар нутгийн маргаанаа зохицуулах асуудлаар зуучлагч Малайз улсад хэлэлцээ хийхээр болжээ.

Дөрөв хоногийн хугацаанд үргэлжлэх хоёр талын яриа хэлэлцээ даваа гарагт Куала Лумпур хотноо эхлэх бөгөөд Тайланд, Камбож улсууд ийнхүү гал зогсоох тохиролцоонд хүрснээс долоо хоногийн дараа хилийн орчмын газар нутгийн маргаантай бүсийн асуудлаар хэлэлцэхээр болоод байна.

АСЕАН-ы эх сурвалжуудын мэдээлснээр газар нутгийн маргаантай хилийн бүсэд гал зогсоосон тохиролцоог хадгалах болон нөхцөл байдлыг ажиглаж, хянах багийг байгуулах асуудал нь энэ удаагийн яриа хэлэлцээний үндсэн сэдвүүд байх ажээ.

Эргэн сануулахад, Тайланд-Камбожийн хилийн орчимд өнгөрсөн сарын 24-ний өдөр эхэлж, 5 өдөр үргэлжилсэн зэвсэгт мөргөлдөөний үеэр хоёр талд 30 гаруй хүн амь үрэгдэж, 300 мянга орчим хүнийг тухайн бүсээс нүүлгэн шилжүүлсэн юм.

Яриа хэлэлцээний сүүлийн өдөр буюу пүрэв гарагт хоёр улсын батлан хамгаалахын сайд нарын түвшний уулзалтыг явуулахаар төлөвлөсөн бөгөөд уулзалтад АНУ, БНХАУ-ын дипломат төлөөлөгчид оролцохоор болжээ.

Энэ долоо хоногийн уулзалтаас гарах үр дүн хоёр талын зөвхөн хил гааль, батлан хамгаалах салбараас гадна худалдааны харилцаа хаашаа чиглэх вэ гэдгийг шийдэх болно хэмээн ажиглагчид хэлж байна.