АНУ-ын ерөнхийлөгч Д.Трамп ажил эрхлэлт суларч байгааг харуулсан шинэ тайлан гарсны дараа АНУ-ын Хөдөлмарийн статистикийн товчооны тэргүүн Эрика Макэнтарферыг ажлаас нь халсан байна.
АНУ-ын Хөдөлмөрийн департаментаас гаргасан статистик мэдээлэлд өнгөрсөн 7-р сард ажил эрхлэлтийн тоо төлөвлөснөөс доогуур байсан бөгөөд шинэ ажлын байрны тоо хэмжээ ковидын цар тахлаас хойшхи хамгийн доогуур үзүүлэлттэй гарчээ.
Тодруулбал, өнгөрсөн сард АНУ-д 73 мянган шинэ ажлын байр нэмэгдсэн бол ажилгүйдлийн хэмжээ 4.1-ээс 4.2 хувь болж өссөн байна.
Д.Трамп хөдөлмөрийн статистикийн товчооны даргыг “ердөө 73000 ажлын байр нэмэгдсэн гэж зориудаар алдаатай тоо баримт гарган танилцуулсан, үүгээрээ Бүгд найрамдах нам болон төрийн тэргүүний нэр хүндийг унагаж, муухай харагдуулахыг хүссэн” хэмээн ямар нэгэн тодорхой нотлох баримтгүйгээр буруутгажээ.
Тэрээр хөдөлмөрийн статистикийн товчооны удирдлагыг улс төрийн зорилгоор худал мэдээлэл тарааж байна хэмээн мэдэгджээ.
Мөн тэрээр өөрийн нийгмийн сүлжээний Truth Social платформд нийтлэсэн мэдэгдэлдээ хөдөлмөрийн статистикийн газрын дарга Эрика Макэнтарферыг 2024 оны АНУ-ын ерөнхийлөгчийн сонгуульд Ардчилсан намын ялалт байгуулах боломжийг нэмэгдүүлэхийн тулд ажлын байрны мэдээллийг “хуурамч”-аар хийсэн хэмээн буруутгасан байна.
Трамп мэдэгдэлдээ түүний засаглалын дор дэлхийд тэргүүлэгч АНУ-ын эдийн засан цэцэглэж байна хэмээн тодотгож, “бидэнд баттай итгэж найдах хүмүүс хэрэгтэй байна” гэжээ.
Трампын дээрх шийдвэрийг эсэргүүцэж, буруутгасан байр суурийг Америкийн статистикийн салбарын олон эксперт, мэргэжилтнүүд илэрхийлээд байна. Эрика Макэнтарферыг халснаар “статистикийн газрын үйл ажиллагааны үндсэн зорилгыг уландаа гишгэсэн, аюултай үйлдэл боллоо” гэсэн байр суурийг Хөдөлмөрийн статистикийн товчооны өмнөх дарга Уилльям Бич илэрхийлжээ.
Ажлын байрны тоо буурч, хөдөлмөрийн зах зээл суларч байгаа явдал нь төв банк буюу АНУ-ын Холбооны нөөцийн санд бодлогын хүүгээ бууруулахад хүргэж байгаа юм.
Трамп тарифын бодлогоо хэрэгжүүлж, олон улс орноос авдаг төрөл бүрийн салбарын бараа бүтээгдэхүүнд ногдуулах импортын татварын хэмжээг нэмснээр дотоодын олон компаниудын үйл ажиллагаа, бизнесийн зардал нэмэгдээд байгаа ажээ.