Бүгд Найрамдах Франц Улсын гэрэл зурагчин Филипп Пакет Мексикийн Нэгдсэн Улсын нийслэл Мехико хотын Дэлхийн соёлын үндэсний музейд “Монгол Улс: Говь цөлөөс Алтайн нуруу хүртэл” нэртэй гэрэл зургийн үзэсгэлэн гаргаж байна. 8 дугаар сарын 14-нд нээлтээ хийсэн эл үзэсгэлэнг Монгол Улс, Мексикийн Нэгдсэн Улс хооронд дипломат харилцаа тогтоосны 50 жилийн ойд зориулан, Монгол Улсаас АНУ-д суугаа Элчин сайдын яам, Монгол Улсаас Мексикийн Нэгдсэн Улсад суугаа Өргөмжит консулын дэмжлэгтэйгээр дэлгэж байна.

Мексикийн ард түмэнд Монголын тал нутгийн үзэсгэлэнт байгаль, монголчуудын соёл, өв уламжлалтай танилцах боломжийг тус үзэсгэлэн олгож байна.

Үзэсгэлэнд гэрэл зурагчин Филипп Пакетын 2023 онд Баян-Өлгий аймаг болон Хустайн нуруу, Говьгурвансайханд авсан монгол нүүдэлчин гэр бүлийн хөрөг зураг, говь цөлийн өвөрмөц тогтоц, Алтайн нурууны сүрлэг уулс болон бүргэдтэй анчдын дүр төрх зэргийг харуулсан гэрэл зургуудыг толилуулж байна.

Уг үзэсгэлэнгийн нээлтэд Мексик дэх Монгол Улсын Өргөмжит консул Энрике Артуро Гутиеррес, Дэлхийн соёлын үндэсний музейн захирал Алехандра Гомез Колорадо, Монгол Улсын Соёлын элч Н.Ганхуяг, Мексикийн Соёлын яам, Үндэсний антропологи, түүхийн хүрээлэнгийн удирдлагууд болон бусад зочид, төлөөлөгчид оролцлоо.