<p><strong>2025.08.21. </strong>Ажил тарах цагаар аадар бууж, Улаанбаатар хотын авто болон явган хүний зам усанд автав. Хосууд нэгнийгээ үүрч, залуус скүүтэр, суррон унаад, ус гаталлаа. Бусад нь ус туучив. Гутал дүүрэн устай, өмдний түрий нь норсон хүмүүс автобусны буудал дээр нийтийн тээвэр хүлээн, дагжина. Төв талбайн урдах зогсоол дээр хүн цугларсаар&#8230;</p> <p>Гадаад харилцааны яамны уулзвар дээр ногоон автобус зогсох боловч замын цагдаа явуулсангүй. Багшийн дээдээс ирж яваа автобуснууд ар араасаа бөөгнөрсөөр&#8230; Офицеруудын ордноос ГХЯ хүртэлх замд түгжрэл үүсэв. ГХЯ-ны уулзвар дээрх цагдаа Замын цагдаагийн гүүрнээс ирж яваа, уг гүүр лүү явж байгаа машиныг татан, МУБИС-иас баруун тийш яваа бүх машиныг зогсоосоор. Сүхбаатарын талбайн урдах зам чөлөөтэй байсан ч 30 минутын дотор пиг боллоо. ГХЯ-наас Төв шуудан чиглэлд замын 1-р эгнээ чөлөөтэй байвч ядаж автобусаа явуулсангүй.</p> <blockquote class="wp-block-quote is-layout-flow wp-block-quote-is-layout-flow"> <p>ГХЯ-наас Төв шуудан чиглэлд замын 1-р эгнээ чөлөөтэй байвч ядаж автобусаа явуулсангүй</p> </blockquote> <p>Замын цагдаагийн, Энхтайвны, Нарны, Гурвалжингийн гүүрээ түгжрэлгүй байлгах нь л тэнд зогсоо цагдаа нарын үүрэг бололтой. Тэр чиглэлд яваа жолооч нарт л үйлчлээд, бусдыг нь хүн гэж тоож байгаа ч юм алга.</p> <p><em>-Замын цагдаа хүртэл баячуудад л үйлчлэх юм даа.</em></p> <p>&#8211;<em><strong>“</strong></em><strong>Гүүр давдаг баячууд гэртээ хурдан харих ёстой. Хотын баруун зах руу явдаг хүмүүс гэртээ хэзээ ч харьсан хамаагүй” гэдэг дүрэм бий болоод удаж байна.</strong></p> <p>&#8211;<em>Хэлээд юү гэх вэ. ГХЯ, Төв шуудан, Баруун 4 замын уулзвар дээр зогсдог цагдаа нарыг ажлаас нь халмаар байна. Баячуудад л үйлчилдэг, ард түмнийг нулимдаг цагдаа нар тэнд зогсдог.</em></p> <p>&#8211;<strong>Тэр цагдаа нар өөрсдөө баян юм байлгүй дээ. Баян хүн баян хүндээ л үйлчилнэ л дээ. Юу гэж манийг бодох вэ дээ.</strong></p> <p>Ийм яриа автобус хүлээж зогсоо хүмүүсийн дунд өрнөлөө.</p> <p>Энэ бол байнга л давтагддаг явдал. Намар ч, өвөл ч, хавар ч, зун ч ийм л байдаг. Дэлхийн хамгийн хүйтэн нийслэлд автобусны буудал дээр бээрч зогсоо хүмүүсийг тэр баян цагдаа нар тоох ч үгүй. Азийн хамгийн хахирган хавартай улсын хавсарганд нүдүүлж зогсоо зорчигчдыг тэр цагдаа боддог ч үгүй. Бөмбөрцгийн хамгийн их үерт авдаг хотын бороонд норсон бээцгэр явгачуулыг тэд анзаардаггүй.</p> <p>Арайхийж өнөө ногоон автобус уулзварт орлоо. Түүний арын автобусыг цагдаа явуулалгүй зогсоочхов. 30 минут лав хүлээлгэсэн байх. Бороо, үер, ус цацах машинуудаас болоод, цаг ч харах боломж байсангүй. Автобусанд арайхийж суусан ч дараагийн зовлон эхлэх нь тэр.</p> <p>1 хүн автобусанд багтахын тулд хойд хаалгаар чихэж байгаад 9000 төгрөгтэй картаа унагажээ. Юун тэрийг авах. 9000 төгрөгтэй карт гарзанд гарав.</p> <p>Автобус жаахан урагшилж, Төв шуудангийн уулзвар хүрээд, дахин 30 минут зогсов. Сүүлдээ хүмүүс “Жолооч оо, яваач ээ”, “1-р эгнээ хоосон байна ш дээ”, “Замын цагдаа цаашаа харчихлаа ш дээ. Гялс явчхаач дээ”, “Яасан унхиагүй юм бэ”, “Шинэ жолооч юм уу”, “Хөгшин юмнууд ингэнэ. Залуу хүн байсан бол аль хэдийнэ самбаачлаад явчихсан байгаа” гэх мэтээр шуугилдав.</p> <blockquote class="wp-block-quote is-layout-flow wp-block-quote-is-layout-flow"> <p>Офицеруудын ордноос Баруун 4 зам хүртэл түгжирсэн жолооч бие засахаар “Хотын жорлон” яваад иржээ</p> </blockquote> <p>Цонхны хажууд суудалд тухалсан залуу дэргэдээ зогсоо өвгөнд суудал тавьж өгсөнгүй. Тэр залуу байсхийгээд ханиалгана. Сүрьеэтэй юм уу, мэнгэртэй ч юм уу, бүү мэд. Сүрьеэтэй бол надаас эхлээд түүний ойр хавийн бүх хүнд савханцар халдсан биз.</p> <p>Арайхийж Төв шуудангийн уулзвар нэвтэрч, цааш түгжирсээр “Мөнгөн завьяа”-гийн буудалд ирэв. Зарим хүн цонх онгойлгоход, сууж байсан хагас ханцуйтай цамцтай хүн хаачихна.</p> <p>&#8211;<em>Цонхоо онгойлгоорой. Олон хүний агаар хэцүү байна шүү.</em></p> <p>&#8211;<strong>Бөгчим байна. Цонхны хажууд суусан хүмүүс бусдыгаа бодоорой.</strong></p> <p>Энэ чимээнээр жолооч кондишн асаав. Гэтэл “Кондишноо унтраа л даа. Ямар мэдрэмжгүй юм бэ. Бороонд норсон хүмүүс даарч байхад, хүйтнээр үлээлгээд байх даа яах вэ дээ” хэмээн хэдэн хүн жолоочийг зэмлэж гарав.</p> <p>Энхтайван найрамдлын ордны буудалд ирэхэд, гаднаас орж ирсэн юм байлгүй 1 хүн урд талын цонхыг онгойлготол өөр нэг нь “Хаа л даа. Нойтон хувцастай даараад байна ш дээ” гэж аашлахад өнөөх нь “Энэ олон хүний үнэр танарт хэцүү байна ш дээ. Чи ч гэсэн бохир агаар амьсгалж байгаа ш дээ” гэв. Ийн тэд муудалцаж, хэсэгтээ л юм болов. &nbsp;</p> <p>&#8211;<em>Ингэж автобусанд шпротны загас болж явахаар машиндаа тааваараа түгжирсэн нь дээр юм байна даа. Тэртэй тэргүй машинд ч, автобусанд ч түгжирч байгаа юм чинь.</em></p> <p>&#8211;<strong>Би ч бас тэгж бодож байна. Ийм заваан орчинд хэдэн цаг зогсож, шахцалдаж, нуруугаа өвтгөж, хөлөө чилээж, бусдын гутлын алчуур болж, үсээ зулгаалгаж, хүнд элдвээр хэлүүлж явахаар машиндаа түгжирч суух минь. Ёстой залхаж байна.</strong></p> <p>&#8211;<em>Автобусаа ч явуулахгүй байж, бас тэгш, сондгойгоор нь явуулна гээд байгаа юм аа. 2 машинтай баячууд өөрсдийгөө л бодож байгаа юм.</em></p> <p>Зарим залуус гар утсан дээрээ татсан апп-аар замын хөдөлгөөнийг харж, “Баруун 4 замаас 5 шар хүртэл түгжрэлгүй, ногоон байна” гэж байлаа. Нарны гүүр давах гэсэн машинуудаа Баруун 4 зам дээрх цагдаа явуулаад, зүүн тийш чиглэсэн машинуудыг нам зогсоожээ. Автобус гэлдэрсээр арайхийж Баруун 4 зам хүрлээ.</p> <p>&#8211;<em>Жаахан урагшилчхаач дээ! Би ч гэсэн гэртээ харимаар байна ш дээ. Бусдыг бод л доо. Амиа бодсон юмнууд. Би л орчихсон бол бусад нь хамаагүй гэсэн байдалтай байх юм аа.</em></p> <p>&#8211;<strong>Ямар ч зай алга аа.</strong></p> <p>&#8211;<em>Хүн ухаан алдчихлаа ш дээ!</em></p> <p>&#8211;<strong><em>Урдуур суусан хүмүүс буугаарай. Ухаан алдсан хүндээ агаар тавиарай.</em></strong></p> <p><em>-Жолооч яасан юм бэ?</em></p> <p><strong>-Жорлон явсаан.</strong></p> <p>&#8211;<em>Хүүш, жолоочоо суулгая л даа. Зай гаргаач дээ.</em></p> <p>Офицеруудын ордноос Баруун 4 зам хүртэл түгжирсэн жолооч бие засахаар “Хотын жорлон” яваад иржээ. Өөр яах ч билээ. Өмдөндөө шээлтэй биш.</p> <blockquote class="wp-block-quote is-layout-flow wp-block-quote-is-layout-flow"> <p>Замаа зөв ашиглаж мэдэхгүй, тээврийн хэрэгслийн хөдөлгөөнөө зохицуулж чадахгүй байгаа замын цагдаа нарыг ажлаас нь халъя!</p> </blockquote> <p>Эндээс эхлээд зам бараг машингүй, хоосон шахуу байв. Гэвч буудал бүрт буух, суух гэсэн хүмүүсээс болоод маш их удаж байлаа. М1: Офицеруудын ордон-5 шар чиглэлийн автобус хэзээд хүнээр хахаж байдаг.</p> <p>Гэртээ ороод цаг харахад 20:30. </p> <p>Автобус явуулах зорилгоор замын 1-р эгнээг үргэлжилсэн цагаан зураасаар тусгаарлан, 1-р эгнээгээр явсан машиныг торгодог болоод удаж байна. Гэвч үүгээр замын цагдаа нар нь МУБИС-аас Баруун 4 замын хооронд автобус ч явуулахаа байгаад бас хэдэн жил болж байна. Юу ч явуулахгүй юм бол зам байгаад яах вэ дээ. Замаа зөв ашиглаж мэдэхгүй, тээврийн хэрэгслийн хөдөлгөөнөө зохицуулж чадахгүй байгаа замын цагдаа нарыг ажлаас нь халъя!</p>