“Counter Strike” тоглоомоор Монгол Улс Дэлхийн цомын аваргуудтай болно гэж итгэх нь байтугай төсөөлөө ч үгүй явсан цаг саяхан. Компьютерын ард сууж, дэлгэц ширтэн, тоглоом тоглолоо гэж нэг нүдээрээ ч үздэггүй байсан сан. Гэтэл энэ төрөл өнөөдөр Дэлхийн өнцөг булан бүрээс үзэгчтэй, хөгжөөн дэмжигчтэй, шагналын сан өндөр, бусад спортоос илүү ч гэж болохуйц, спортын бие даасан төрөл гэгдэн, нэр хүндтэй болжээ.
Ази тивийн зүрхэнд орших 3,5 сая гаруй хүн амтай Монгол Улсаас атгасан гар шиг “The MongolZ” баг цахим спортын Дэлхийн цомын аварга болж, цэнхэр гараг даяар нэрээ дуурсгаж байна. Чингис хаанаараа бахархдаг монголчууд өдгөө цахим спорт, “The MongolZ” багаар Дэлхийг дайлаар морддог боллоо. Аль ч улсад очсон манай улсын багийг дэмждэг олон мянган хүн байдаг болсон.
Саудын Арабын Эр-Рияд хотноо болсон “Esport World Cup 2025”-д ч аренад буй үзэгчдийн ихэнх нь “MongolZ”-ыг дэмжиж байв. Тэдний нэрийг дуудаж, аваргууд хэмээн хашхирч, амьсгаа даран дэмжих хөгжөөн дэмжигчид ёстой л нас насны, улс улсынх байсныг та бүхэн харсан биз ээ. Энэ бол “MongolZ”-ын залуусын үр нөлөө, Монгол Улсаа сурталчлан Дэлхийд нэрээ гаргаж байгаагийн илрэл.
Тиймдээ ч тэдний үр нөлөө, гаргаж буй амжилтын талаар Sports.net болон бусад томоохон esports платформ, спортын аналистууд 3DMAX болон “Vitality” зэрэг хүчирхэг багийг ялж, Grand Final-д 3:0 харьцаатай ялалт байгуулсан нь “The MongolZ”-ын хамгийн том амжилт хэмээн шуугьж байна.
Тэгвэл Дэлхийн тавцанд нэрээ гаргаж буй энэ багаа бид хэрхэн дэмжиж байгаа вэ? Өнгөрсөн гуравдугаар сард “The MongolZ” баг Монгол Улсын Үндэсний шигшээ багийн бүрэлдэхүүнд нэгдсэн. Ингэснээр Засгийн газар “The Mongolz” баг болон и-спортын хөгжлийг иж бүрэн дэмжих боломж бүрдсэн хэмээн сайд нь мэдэгдсэн билээ. Түүнээс хойш ямар дэмжлэг тэдэнд очсон бэ?
Одоо тэдний өрсөлдөж буй энэ төрөлд Дэлхийн чансааг Францын “Team Vitality” баг тэргүүлдэг. Тус баг энэ оны зургаан сарын байдлаар оролцсон бүх тэмцээндээ аваргын цом өргөсөн. Хамгийн сүүлд гэхэд “Blast Tv Austin Major” буюу 2025 оны ДАШД-д түрүүлсэн билээ. Ийн Дэлхийд нэрээ гаргасан тэд Францын Засгийн газрынхаа дэмжлэгтэйгээр и-спортыг спортын нэг төрөл хэмээн бүрэн хүлээн зөвшөөрүүлж чадсан.
Тодруулбал тус улсын Олимпын хороо, Спортын яам нь цахим спортыг залуусыг хөгжүүлэх бодлогын нэг хэсэг болгосон байна. Мөн үндэсний томоохон компаниуд болох харилцаа холбооны “Orange”, машин үйлдвэрлэгч “Renault” компани нь “Vitality” багаа ивээн тэтгэж, тоглогчдод цалин хөлс олгохоос гадна и-спортын мэргэжлийн байдлыг ирээдүйн технологийн салбар гэж үзэж, интернэт, дата, дижитал платформын дэмжлэг үзүүлдэг. Энэ нь “Team Vitality” багийг Дэлхийн топ багийн түвшинд хүргэхэд том түлхэц болсон. Үр дүнд нь тэд улсдаа эдийн засгийн болон соёлын үнэ цэнэ бий болгосон төдийгүй Дэлхийд улсынхаа нэр хүндийг өргөсөөр байна.
Мөн “Crédit Agricole” банктай хамтран “Vitality School” нэртэй спорт академи байгуулж, 12-17 насны хүүхдүүдэд и-спортын боловсрол, техник, спортын ёс зүй заах хөтөлбөр хэрэгжүүлж эхэллээ. Үүний зэрэгцээ 12 клуб хамтран “French Union of Professional Esports Clubs” (UFCEP) байгуулжээ. Тус байгууллага и-спортын эрх зүйн орчин, тамирчны эрх болон тоглолтын зохион байгуулалтыг сайжруулах үүрэгтэй.
“Team Vitality” ингэж л Дэлхийн чансааг тэргүүлж, хүчирхэг баг гэдгээ олон улсын тавцанд харуулж чадаж байна. Тиймээс Монгол Улсын Засгийн газар үндэсний шигшээ багийн бүрэлдэхүүнд багтсан “The MongolZ” багийг Францын жишгээр дэмжиж, Дэлхийн топ багийн нэг болгоход анхаарах цаг хэдийнэ болжээ. Мэдээж цахим спортын шагналын сан өндөр байдаг учраас санхүүгийн хувьд баг, бүрэлдэхүүн тэмцээндээ асуудалгүй оролцчихно. Гол нь эх орныхоо нэрийг сурталчилж буй тэдэнд виз, бэлтгэлийн бааз болон олон улсын тэмцээнд оролцох өндөр хурдны интернэт, дата бааз зэрэг эрх зүйн орчин талаас нь дэмжих хэрэгтэй.
Япон Улсад 2026 онд болох “Айчи-Нагояа 2026” зуны 20 дугаар наадмын хөтөлбөрт и-спортын 8 төрөл багтаад буй. Цахим спорт улам л хүрээгээ тэлж, хүчээ авах учраас өдгөө Дэлхийд өрсөлдөх багтай болсон бид тал талаас нь дэмжих үүрэг л үлдээд байна.