Тав дахь удаагийн “Монгол-Хятадын Экспо” үзэсгэлэн яармагийн арга хэмжээ ӨМӨЗО-ны нийслэл Хөх хотод даваа гарагт нээгдээд байна.

Нээлтийн ёслолд Монгол Улсын Тэргүүн шадар сайд бөгөөд Эдийн засгийн хөгжлийн сайд Н. Учрал, Хөдөө аж ахуй, хөнгөн үйлдвэрийн яамны Төрийн нарийн бичгийн дарга Т. Жамбалцэрэн нар үг хэллээ.

Энэхүү арга хэмжээ нь бүс нутгийн хөгжил, хоёр талын худалдаа, эдийн засгийн хамтын ажиллагааг ахиулан гүнзгийрүүлэх, хил орчмын бүс нутгийн эдийн засгийн хөгжлийг хөхиүлэн дэмжих, хоёр орны аж үйлдвэр, нийлүүлэлтийн сүлжээний хамтын ажиллагааг бэхжүүлэхэд чухал үүрэг гүйцэтгэдэг платформ юм. 

Энэ удаагийн экспо нь Хятад-Монгол-Оросын эдийн засгийн коридор, Их Түмэн санаачилга зэрэг платформоор дамжуулан олон талт хамтын ажиллагааг бэхжүүлэх зорилготойгоос гадна БНХАУ-ын “Бүс ба Зам” санаачилга болон Монголын “Талын зам” стратегийн хамтын ажиллагааг дэмжих болно.

Мөн үзэсгэлэн яармагийн арга хэмжээг олон улсын чанартай болгох, мэргэшүүлэх, цахимжуулах, өндөр зэрэглэлийн үйлчилгээ гэсэн дөрвөн том шинэчлэлтийг хийхээр төлөвлөжээ.

Ням гарагт Бүх Хятадын Ардын Төлөөлөгчдийн Их Хурлын Байнгын Хорооны дэд дарга, Хятадын Ардчиллыг дэмжих нийгэмлэгийн дарга Цай Дафэн Хөх хотод зохиогдож буй V удаагийн Хятад–Монголын Экспод оролцохоор хүрэлцэн ирсэн Монгол Улсын Тэргүүн Шадар сайд бөгөөд Эдийн засгийн хөгжлийн сайд Н.Учралаар ахлуулсан төлөөлөгчидтэй уулзаж, хоёр тал олон салбарт хамтын ажиллагааг гүнзгийрүүлэх талаар санал солилцжээ.

2024 онд Хятад, Монголын худалдааны хэмжээ 18.62 тэрбум ам.долларт хүрч, дээд амжилт тогтоосныг мөн арга хэмжээний үеэр онцолсон байна.