Америкийн поп од, дуучин Тэйлор Свифт өөрийн найз залуу, америкийн үндэсний хөлбөмбөгийн лигийн Канзас Сити Чифс багийн тоглогч Трэвис Келситэй сүй тавьснаа инстаграм хуудсандаа зарласан байна. 

Трэвис Келси, Тэйлор Свифт нар үерхэж буйгаа зарласнаас 2 жил орчмын дараа сүй тавьж, гэрлэхээр болсноо ийнхүү зарлалаа.

Тэйлор Свифт шүтэн бишрэгч нартаа хандаж “Танай англи хэлний багш чинь биеийн тамирын багштай гэрлэх гэж байна” хэмээн инстаграм хуудсандаа бичиж, Трэвис Келси-гийн гэрлэх санал тавьж буй мөчийг харуулсан гэрэл зургуудын хамт нийтэлжээ.

Харин дээрх үйл явдал хоёр долоо хоногийн өмнө болсон гэдгийг сүйт залуугийн эцэг Эд Келси тусдаа мэдэгджээ.

Сүйн бөгжний загварыг Artifex Fine Jewellery компанийн уран дархан Киндред Любек гаргаж бүтээсэн бөгөөд викторианы эрин үеийн загвартай, очир эрдэнийн шигтгээтэй тус бөгж ойролцоогоор 550 мянган ам.долларын үнэтэй талаар “Brides” сэтгүүл мэдээллээ.

Тэйлор Свифтийн сүй тавьснаа зарласан инстаграмын нийтлэл нэг цагийн дараа 6 сая, хоёр цагийн дараа 13 сая гаруй лайк цуглуулжээ.

АНУ-ын ерөнхийлөгч Д.Трамп, Америкийн үндэсний хөлбөмбөгийн лиг, Канзас Сити Чифс баг, дуучин Сабрина Карпентер, Чарли Пут, Аврил Лавинь, загвар өмсөгч Жижи Хадид, Карли Клосс, Кара Делевинь, сагсан бөмбөгийн од тамирчин Кейтлин Кларк, теннисчин Ига Свиатек зэрэг улс төр, урлаг соёл, спортын салбарын олон алдартнууд Трэвис Келси, Тэйлор Свифт нарт баяр хүргэж, аз жаргал, сайн сайхныг хүссэн байна.

Тэйлор Свифтийн хувьд өмнө нь The 1975 хамтлагийн дуучин Матти Хили, Английн жүжигчин Жо Алвин, дуучин Харри Стайлс, Жон Майер, Холливудын жүжигчин Жейк Жилленхол зэрэг олон алдартай залуустай үерхэж байсан бөгөөд тамирчин Трэвис Келситэй 2023 оны сүүлээр болзож эхэлснээ зарлаж байсан юм.

Ийнхүү хосууд сүй тавьсан ч хуримын товоо хараахан зарлаагүй байна. Дуучин Тэйлор Свифт удахгүй гаргах гэж байгаа шинэ цомгийн сурталчилгааны ажилдаа дарагдаж, завгүй болох учраас хуримын тов хожуу зарлагдаж магадгүй талаар Америкийн хэвлэлүүд бичиж байна.