Япон болон Энэтхэгийн Засгийн газруудын хооронд ойрын 5 жилийн хугацаанд хагас сая гаруй мэргэжилтэн харилцан солилцох тохиролцоонд хүрэх асуудлаар эдгээр өдрүүдэд хэлэлцээ хийгдэж байна. Баасан гарагт эхлэх Энэтхэгийн Ерөнхий сайдын Япон улсад хийх албан айлчлалын хүрээнд Н.Моди, Ш.Ишиба нар уулзаж, дээрх асуудлыг хэлэлцэхээр болжээ.

Тодруулбал, Энэтхэгээс шинжлэх ухаан, инженерчлэлийн чиглэлийн өндөр мэргэшсэн 500,000 мэргэжилтэн хүлээж авахаар Япон улс төлөвлөөд байна. Үүний гол зорилго нь Япон улсын эдийн засгийн өсөлтийг дэмжиж, бүс нутгийн хөгжлийг сэргээн нэмэгдүүлэхэд оршиж байгаа ажээ.

Мөн хоёр улсын удирдагч нар сансар судлал, ялангуяа ус байж магадгүй гэгдэж буй Сарны өмнөд туйлын судалгаанд хамтран ажиллахаас гадна хиймэл оюуны хөгжүүлэлт, устөрөгчийн эрчим хүчний хэрэглээ болон анагаах ухааны салбарын нэн шинэ үеийн судалгаанд хамтран ажиллах тохиролцоонд хүрэхээр төлөвлөжээ.

Япон улсын Засгийн газраас мөн Энэтхэг улсад 68 тэрбум ам.долларын урт хугацааны хөрөнгө оруулалтыг хувийн хэвшлийн салбарт хийж магадгүй байгаа талаар эх сурвалжууд мэдээлж байна.

Энэтхэгийн Ерөнхий сайд Нарендра Моди энэ сарын 29-31 хооронд Япон улсад айлчилна. Н.Моди, Японы Ерөнхий Шигэрү Ишиба нар бямба гарагт Японы зүүн хойд хэсгийн Мияги мужид байрладаг хагас дамжуулагчийн эд ангийн үйлдвэрт зочилж, үйл ажиллагаатай нь танилцахаар болжээ. Тэд хамтдаа хагас дамжуулагч болон бусад ховор чухал материалын нийлүүлэлтийн сүлжээг бэхжүүлэхийн тулд хамтран ажиллах тодорхой арга замыг эрэлхийлж байгаа. Хоёр улсын Ерөнхий сайд нарын дээд хэмжээний уулзалт хэлэлцээний үр дүнд гаргах баримт бичигт Японы Засгийн газар дээрх зорилтыг дурьдаж магадгүй гэж эх сурвалжууд мэдээллээ.