Тэрбумтан Элон Маск даваа гарагт АНУ-ын Техас мужийн холбооны шүүхэд “Apple” болон “OpenAI” компанийн эсрэг гомдол гаргасан байна. Тодруулбал: “OpenAI” компанийн хиймэл оюуны бүтээгдэхүүн болох “ChatGPT” чатботыг “iPhone” утасны үйлдлийн системтэй холбож, тусгайлсан хиймэл оюуны үйлчилгээ болгож буй явдлыг Шударга өрсөлдөөний хууль зөрчиж, технологийн салбарт хууль бус хамтрал үүсгэн, монопольчилж байна хэмээн Элон Маскийн нийгмийн сүлжээний Х компани, хиймэл оюун ухааны “xAI” компани буруутган, “Apple”, “OpenAI” компанийг шүүхэд өгчээ.
61 хуудас бүхий гомдолд мөн Элон Маскийн хиймэл оюуны “xAI” компанийн хөгжүүлж буй “Grok” чатботыг “iPhone” утасны үйлчилгээнээс блоклож байгааг онцлохын сацуу “Apple” компани Америкийн ухаалаг гар утасны зах зээлийн 65 хувь, “OpenAI” компани бүтээлч хиймэл оюуны зах зээлийн 80 орчим хувийг дангаараа эзэмшиж, монополь тогтоогоод байгааг тодотгосон байна.
“Apple”, “OpenAI” компани 2024 оны 6-р сард хамтын ажиллагаагаа зарласнаар “ChatGPT” чатботыг “Apple”-ийн “Siri” дуут туслах болон “iPhone” утасны бусад функцээр дамжуулан ашиглах боломжтой хиймэл оюуны онцгой туслах болгосон юм.
Тэгвэл дээрх хамтын ажиллагааны дагуу олон зуун сая “iPhone” утас хэрэглэгч зөвхөн “ChatGPT” чатботоор дамжуулан “олон тэрбум үйлчилгээ” авах онцгой эрхийг “OpenA”I компани дангаараа эзэмшиж байгаа нь Шударга өрсөлдөөний хууль зөрчиж, мөн “Apple” компанийг аппликэйшн татах “App Store” дэлгүүрт “ChatGPT”-д давуу эрх олгож байна хэмээн Элон Маск буруутгажээ.
Ийнхүү нэгэн цагт “OpenAI” компанийг хамтран үүсгэн байгуулсан Элон Маск, Сэм Олтмэн нар олон жилийн дараа дайсан болон хувирч, нийгмийн сүлжээгээр маргалдахдаа тулж, улмаар шүүхдэлцэхээр болоод байна. Дээрх гомдолд “OpenAI” болон “Apple” компани хараахан албан ёсны мэдэгдэл гаргаагүй байна.
Элон Маск “OpenAI” болон бусад хиймэл оюуны салбарын томоохон тоглогчтой өрсөлдөх зорилгоор 2023 онд хиймэл оюуны технологи хөгжүүлэлтийн “xAI” компаниа байгуулж, олон тэрбум ам.долларын хөрөнгө оруулсан юм.