Оросын арми Украин улсын төвийн хэсгийн Днепропетровск мужид нэвтрэн орж ирсэн болохыг Украины улс анх удаагаа хүлээн зөвшөөрсөн мэдэгдлийг мягмар гарагт хийжээ.
Тус мужийн стратегийн зэвсэгт хүчний ажиллагааг хариуцаж байгаа албаны хэвлэлийн төлөөлөгч Виктор Трегубов “Оросын зэвсэгт хүчин мужид нэвтэрч орж ирсэн нь үнэн боловч тулаан үргэлжилж байгаа” хэмээн мэдэгджээ.
Галын шугамын талаар ойрын эх сурвалжаас мэдээллэдэг DeepState вебсайтын зүгээс “Оросын арми байршлуудаа нэгтгэж, дараагийн давшилтад бэлдэх хүрээнд хуурай газрын цэргүүдээ хуримтлуулж байна” гэж мэдээлсэн байна.
Өнгөрсөн 7-р сард Оросын арми Днепропетровск муж руу давшиж, жижиг хот, тосгон зэрэг зарим байршлуудыг эзэлсэн талаараа мэдэгдэл хийж байсан бол тухайн хэсгийн Запорижке, Новогеоргивка зэрэг тосгоныг бүрэн эзлэсэн гэх Москвагийн мэдэгдлийг няцаасан мэдэгдлийг Украины зэвсэгт хүчний нэгдсэн штабаас энэ долоо хоногт хийсэн юм.
Оросын зэвсэгт хүчин удаан ч гэсэн тогтвортой байдлаар давшилтаа урагшлуулж, Украины зүүн болон өмнөд нутгуудын газар нутгийг эзлэн урагшилсаар байна. Дайн эхэлснээс хойш ОХУ Украины Донецк, Херсон, Луганск, Запорожье гэсэн дөрвөн мужийг эзэлж, хяналтаа тогтоон, ОХУ-ын нутаг дэвсгэр гэж мэдэгдсээр байгаа юм.
Харин энэ үеэр дайныг өндөрлүүлж, энхийн хэлэлцээр байгуулахад чиглэсэн АНУ-ын ерөнхийлөгч Д.Трампын хичээл зүтгэл төдийлөн амжилт олохгүй үргэлжилсээр байгаа бөгөөд Путин-Зеленский нарын уулзалт явагдах эсэх нь тодорхойгүй болоод байна.
Цагаан ордонд мягмар гарагт зохиогдсон Трампын засаг захиргааны кабинетын хуралдааны төгсгөлд “Орос-Украины удирдагчид уулзахгүй, гал зогсоох тохиролцоонд хүрэхгүй бол яах вэ” гэсэн сэтгүүлчийн асуултад АНУ ОХУ-ын эсрэг эдийн засгийн хатуу хориг арга хэмжээ авах болно гэж Д.Трамп хариулсан байна.
“Мөргөлдөөн заавал дуусах ёстой бөгөөд АНУ эдийн засгийн хориг арга хэмжээ хэрэгжүүлэх эрхтэйг мартаж болохгүй. Энэ нь цэрэг, дайны бус, зөвхөн эдийн засгийн арга тул дэлхийн дайн өдөөх эрсдэлгүй. Хэлэлцээ хийх нь зөвхөн нэг талын бус, харилцан оролцоог шаарддаг тул Украины тал ч мөн бэлтгэлтэй байх ёстой” хэмээн АНУ-ын ерөнхийлөгч цохон тэмдэглэсэн байна.
Путин Украины ерөнхийлөгчтэй хоёр талт уулзалт явуулахаас татгалзсан хэдий ч В.Зеленский дээд хэмжээний уулзалтыг бодит ажил болгохыг эрмэлзэж, уулзалтыг зохион байгуулах боломжтой хэд хэдэн улс орнуудтай холбогдон ярилцаж байна. Тэрээр мягмар гарагт хийсэн дүрстэй мэдэгдэлдээ энэ долоо хоногт Турк, Ойрхи Дорнод, Европын улс орнуудтай уулзалтыг зохион байгуулах асуудлаар холбогдож хэлэлцэхээр болсныг онцолж, Украины талаас дайныг өндөрлүүлэх асуудлаар бүх талын бэлэн байдалд байх болно гэжээ.
Мөн тэрээр цаашдаа АНУ ОХУ-д хэр их дарамт шахалт (эдийн засгийн хориг, тариф) үзүүлэхээс бүх зүйл шалтгаална гэдгийг нэмж хэлсэн байна. Тэрээр яг энэхүү асуудлаар даваа гарагт Украины асуудал хариуцсан АНУ-ын ерөнхийлөгчийн тусгай элч төлөөлөгч Кейт Келлоггтой Киев хотноо уулзсан юм.
Украины гадаад хэргийн сайд Андрей Сибига мөн Украин улс хаана ч, ямар ч хэлбэрээр уулзалт хийхэд бэлэн байгааг нийгмийн сүлжээнд мэдэгджээ.