“Хатуу самар” киногоороо дэлхийд танигдсан, Холливудын алдарт жүжигчин Брюс Уиллисийн биеийн байдал сайн байгаа талаар түүний эхнэр Эмма Хэминг Уиллис Америкийн АВС телевизийн бүтээлд өгсөн ярилцлагадаа хэлсэн байна.

Тэрээр жүжигчний эрүүл мэндийн талаар анх удаагаа олон нийтэд мэдээлэл хийж, дуугарч байгаа нь энэ бөгөөд биеийн байдал нь ерөнхийдөө тун сайн, хөдөлгөөн сайтай, бусадтай ойлголцож чадаж байгаа ч тархины үйл ажиллагаа нь л доголдолтой байгаа талаар хэлжээ.

Өдгөө 70 настай жүжигчин Брюс Уиллис одоогоос 3 жил гаруйн өмнө хүний зан байдал, хэл ярианд нөлөөлдөг тархины өмнөд хэсгийн сэтгэцийн олдмол өвчтэй гэж оношлогдсон юм.

Энэ нь маш бага судлагдсан ч өвчтнүүдийн тоо нь өсөж буй өвчин бөгөөд Брюс Уиллисийн эхнэр, загвар өмсөгч, энтрепренер Эмма Хэминг Уиллис удахгүй дээрх өвчинтэй холбоотой өөрийн гэр бүлийн туулж өнгөрүүлж буй амьдралынхаа талаар ном гаргахаар болжээ.

“Unexpected Journey: Finding Strength, Hope, and Yourself on the Caregiving Path” (Гэнэтийн аялал: Асран халамжлах замдаа хүч чадал, итгэл найдвар, өөрийгөө олох нь) хэмээх урт нэртэй номоо тэрээр ижил төрлийн сэтгэц мэдрэлийн өвчин туссан хүмүүсийн гэр бүл, асран хамгаалагчдад зориулан асран халамжлах гарын авлага маягаар бичсэн байна.

Хоёр бяцхан охинтой Брюс Уиллисийн эхнэр Эмма болон жүжигчний өмнөх эхнэр Деми Мур, тэдний дундаас төрсөн гурван охин гээд бүгд Брюс Уиллисийг халамжлан хайрласаар байгаа юм.

“Эмма ба Брюс: Гэнэтийн аялал” хэмээх АВС телевизийн бүтээл мягмар гарагт цацагдсан бөгөөд лхагва гарагаас эхлэн  Disney+ болон Hulu платформууд дээр тавигдаад байна.