102 настай Япон улсын иргэн Кокичи Акузава Фүжи уулын оргилд гарсан хамгийн өндөр настай хүнээр тодорч, Гиннессийн дээд амжилтын эзэн болсон байна.

Тэрээр хууч өвчин, зүрхний асуудал зэргээ даван туулж Фүжи уулын оргилд гарч чадсан бөгөөд өөрийн энэхүү амжилтыг тогтмол ууланд алхдагтай холбон тайлбарлаж, мөн долоо хоног бүр тогтмол бэлтгэл хийж байснаа хэлжээ.

Харин ахиж Фүжи уулын оргилд гарах уу гэсэн сэтгүүлчийн асуултад тэрээр шууд “үгүй” гэж хариулжээ.

Кокичи Акузава Фүжи уулын оргилд энэ сарын эхээр гарсан бөгөөд дэлхийн дээд амжилтуудыг бүртгэдэг Гиннессийн номонд түүний амжилтыг энэ долоо хоногт албан ёсоор бүртгэж авсан байна.

1923 онд төрсөн Кокичи Акузава 6 жилийн өмнө 96 настайдаа мөн Фүжи уулын оройд гарч байсан бөгөөд 102 насандаа дахин амжилттай дайралт хийснээр тус уулын оргилд гарсан хамгийн өндөр настай хүний амжилтыг тогтоожээ.

Тэрээр 2 шөнө, 3 өдрийн дотор уулын оргилд гарч чадсан байна. Түүнтэй цуг түүнийг дэмжиж олон хүн авиралт хийсний дотор сувилагч мэргэжилтэй зээ охин нь багтсан байна.

Кокичи Акузава нь тэтгэвэртээ гарсан малчин хүн бөгөөд ууланд авирахаас гадна ахмадуудын асрамжийн төвд сайн дурын ажил хийж, уран зургийн хичээл заадаг ажээ.