Нийслэлийн Түргэн тусламжийн төвийн эмч яаралтай дуудлага руугаа түгжрэлээс болоод гүйж байгаа бичлэг цахим орчинд цацагдсан. Түүнийг Х.Хуанган гэдэг бөгөөд Нийслэлийн Түргэн тусламжийн төвийн Баянзүрх салбарын II ээлжинд дуудлагын их эмчээр ажилладаг аж. Ингээд түүнтэй цөөн хором ярилцсанаа хүргэе.
————————————————————————-
-Нийслэлийн Түргэн тусламжийн төвд хэдэн жил ажиллаж байна вэ?
-Миний хувьд Нийслэлийн Түргэн тусламжийн төвд 2020 оноос хойш ажиллаж байгаа.
-Цахим орчинд тавигдсан бичлэг дээр ямар дуудлага руу явж байсан бэ?
-Яаралтай дуудлагууд их тохиолддог. Тухайн өдрийн хувьд 50 гаруй настай хүн И-Мартын нэгдүгээр давхарт ухаан алдсан гээд яаралтай дуудлага авсан байсан. Сансараас гараад И-Март руу уруудахад, машин зөрөх, голоор нь машин явах ямар ч боломжгүй газар түгжирсэн байсан учраас ямартаа ч очоод тусламжаа үзүүлье гэж бодоод гүйж байгаа бичлэг маань тавигдсан байна лээ. Бичлэг дээр харагдаж байгаа нь л би болохоос биш 103-ын эмч нарт ийм тохиолдол байнга гардаг. Ер нь яаралтай үед энэ зэргийн гүйлтүүдийг хийдэг л дээ. (инээв)
-Түргэний эмчээр ажиллахад түгжрэлээс авахуулаад асуудлууд их гардаг биз?
-Хамгийн гол асуудал нь түгжрэл. Минут, секундээр хэмжигддэг янз бүрийн өвчнүүд байдаг учраас 5 минутын дотор л очихгүй бол зүрх нь зогсох аюул байдаг. Аль болох хамгийн хурднаараа л тусламжаа үзүүлэхийг хичээдэг дээ. Мөн хаяг нь тодорхойгүй газрууд зөндөө бий. Нэг үеэ бодоход хаягжилт нь харьцангуй тодорхой болсон ч гэсэн энэ асуудал байсаар байгаа.
-Өдөрт хэдэн дуудлагад явдаг вэ. Ихэвчлэн ямар төрлийн дуудлага ирдэг вэ?
-Манай дуудлагын 50-60 хувь нь архидалттай холбоотой байдаг. Мөн хүүхэд төрөх, осол гэмтлийн дуудлагууд байдаг. Үүнээс гадна архидалттай холбоотой дуудлага өгсөн хүмүүс “нохой зүгээр” гэж хэлчихээд оронгуут нохой нь дайрдаг асуудал хааяа гардаг. Ер нь түргэний эмч нар газар дээрх тусламжийг үзүүлдэг гэсэн үг. Улаанбаатар хотын хэмжээнд өдөрт түргэн тусламжийн 40-45 баг гарч ажилладаг.
Нэг баг өдөрт хамгийн багадаа 40-50 дуудлагад явдаг. Өвлийн улиралд 60-70 дуудлага хүлээж авдаг. Сүүлийн үед шөнө оройн цагаар осол гэмтлийн дуудлагууд их ирж байна. Мөн мопет, скүүтертэй холбоотой зам тээврийн ослын дуудлагууд ирж байна.
-Иргэддээ хандаж юу гэж хэлмээр байна?
-Түргэний машинд л зам тавьж өгч байгаарай л гэж хэлье. Хүнгүй явж байсан ч дуудлага руугаа яараад явж байж болох учраас аль болох иргэд маань зам тавиад өгчихвөл бид хүний амь насыг цаг алдахгүйгээр аварч чадна.
Эх сурвалж: “Өдрийн сонин”
Г.Балгармаа