Лхагва гарагт АНУ-ын Миннеаполис хотын католик шашны сүмд гарсан халдлагын улмаас 2 хүүхэд амь үрэгдэж, 19 хүн шархадсан талаар хотын цагдаагийн газраас мэдээллээ.
Эрх баригчдын зүгээс мэдээлснээр халдлагыг байлдааны зориулалттай автомат буу, үрлэн сумтай буу болон гар буугаар зэвсэглэсэн этгээд үйлдсэн ба тэрээр халдлага үйлдсэнийхээ дараа өөрийгөө буудан, амиа егүүтгэсэн байна.
Харин халдлагын улмаас 8 болон 10 настай хоёр сурагч амь үрэгдэж, мөн шархадсан хүмүүсийн дийлэнх нь сурагч нар байсан байна. Католик сургуулийн сурагчид хичээлийн шинэ жилийн эхний мөргөлөө үйлдэхээр тухайн сүмд цуглараад байх үед зэвсэгт этгээд халдлагыг үйлджээ.
Цагдаагийн албан хаагчдын мэдээлснээр халдлагыг үйлдсэн этгээд сүмийн гадна талаас цонх руу автомат буугаар гал нээж шүршиж эхэлсэн гэжээ.
Мөн халдлагатай холбогдуулан хийсэн хэвлэлийн бага хурлын үеэр хотын цагдаагийн дарга уг халдлагыг өмнө нь ямар нэгэн гэмт хэргийн түүхгүй, 23 настай Робин Уэстман гэх эрэгтэй үйлдсэн болохыг мэдээлсэн байна. Тэрээр халдлагыг үйлдэхтэй зэрэгцээд интернетэд тунхаг бүхий мэдэгдэл байршуулсныг хотын цагдаагийн газар Холбооны мөрдөх товчоотой хамтран цахим орчноос буулган авч, дээрх мэдэгдлийг нарийвчлан судлах ажлыг эхлүүлжээ.
Энэхүү зэвсэгт халдлагын хэргийг АНУ-ын хууль сахиулах төрөл бүрийн байгууллагууд мөрдөн шалгаж байгаа бөгөөд дотоодын терроризм болон католик шашны эсрэг үзэн ядалтын шинжтэй гэмт хэрэг гэсэн хувилбаруудаар шалгаж байгааг Холбооны мөрдөх товчооны дарга Каш Пател пүрэв гарагт мэдэгдээд байна.
Уг халдлагын талаар мэдээлэл авсан АНУ-ын ерөнхийлөгч Д.Трамп “Цагаан ордон энэхүү аймшигтай халдлагын нөхцөл байдлыг ойроос ажиглан хянах болно, хохирогчдын төлөө хамтдаа залбирахыг хүсэж байна” хэмээн өөрийн Truth Social нийгмийн сүлжээний платформд бичжээ.
АНУ-д хичээлийн шинэ жил эхлэж байгаа эдгээр өдрүүдэд коллеж, их сургуулиудын ойр орчимд галт зэвсэгтэй халдлагууд гарах тухай хуурамч мэдээ, мэдээлэл олноор цацагдаж байгаа үед уг харамсалтай халдлага гарлаа.
2025 онд АНУ-д галт зэвсгээр үйлдэгдсэн 286 хэрэг гараад байгааг энэ төрлийн гэмт хэргүүдийг баримтжуулан бүртгэдэг “Gun Violence Archive” ашгийн бус бүлгийн зүгээс мэдээлжээ.