horoscope
horoscope
horoscope
Odmundur radio - FM 83.3/107
userГ. Мөнх-Эрдэнэ

82 дахь удаагийн Венецийн кино наадам нээгдлээ

post-img

Лхагва гарагт Италийн Венец хоттой зэргэлдээ орших Лидо арал дээр 82 дахь удаагийн Венецийн олон улсын кино наадам нээгдлээ.

Энэ жилийн кино фестивалийг Италийн найруулагч Паоло Соррентиногийн шинэ бүтээл болох “La Grazia” киногоор нээгээд байна. Дэлхийн нээлтээ хийсэн тус уран бүтээл мөн Венецийн кино наадмын дээд шагналд давхар өрсөлдөж байгаа ажээ.

Түүнчлэн “Алтан арслан” шагналын төлөө АНУ, БНХАУ, Франц, Итали, Ирланд, Унгар, Герман, Швед, Өмнөд Солонгос, Тунис зэрэг олон улс орны нийт 22 кино өрсөлдөж байна.

Энэ удаагийн наадмын үеэр мөн найруулагч Ноа Баумбахын “Jay Kelly”, Йоргос Лантимосын “Bugonia”, Ласло Немешийн “Orphan”, Лука Гуаданиньогийн “After The Hunt”, Гиермо Дел Торогийн “Frankenstein”, Оливье Ассаясын “The Wizard of Kremlin” зэрэг кино сонирхогчид, үзэгч олны анхаарлыг татаж хүлээлт үүсгээд буй олон шинэ уран бүтээлүүд нээлтээ хийхээр болжээ.

Мөн нэрт найруулагч Жим Жармуш, Пак Чан Вук, Кэтрин Бигэлоу, Гас Ван Сэнт, Лукрециа Мартел, Франсуа Озон, Даниэль Викари гэх зэрэг кино урлагийн салбарын олон алдартнууд уригдан ирж оролцож байна.

82 дахь удаагийн Венецийн олон улсын кино наадмын шүүгчдийн багийн ерөнхийлөгчөөр Америкийн найруулагч Александр Пэйн ажиллаж байгаа бол багийн бүрэлдэхүүнд Францын найруулагч Стефани Бризе, Италийн найруулагч Маура Делперо, Румыны найруудагч Криштиан Мингиу, Ираны найруулагч Мохаммад Расулоф, Хятадын жүжигчин Жао Тао, Бразилын жүжигчин Фернанда Торрес нар багтжээ.

Кино нээлтүүд, улаан хивсний ёслолууд, хэлэлцүүлгүүд, наадмын шагналт уралдаануудаас гадна мөн энэ жил 82 настай Германы жүжигчин Вернер Херцог, 92 настай Америкийн жүжигчин Ким Новак нарт кино урлагийн салбарт ажилласан нөр их хөдөлмөрийг нь үнэлж, хүндэтгэлийн “Алтан арслан” шагналыг гардуулаад байна.

Фестивалийн үеэр Газын зурваст өрнөж буй дайн, геноцид, хүмүүнлэгийн хямралыг эсэргүүцсэн иргэдийн жагсаал цуглаан давхар зохиогдож байна.

82 дахь удаагийн Венецийн олон улсын кино наадам ирэх сарын 6-ны өдрийг дуустал үргэлжлэн зохион байгуулагдана.

0/1000