Иран улс Олон улсын атомын эрчим хүчний агентлагийн зарим шинжээчдийг тус улсад ажиллахыг зөвшөөрчээ.

Ираны гадаад хэргийн сайд Аббас Арагчи лхагва гарагт хийсэн мэдэгдэлдээ, тус улсын Бушерын цөмийн цахилгаан станцид очиж, түлш солих үйл явцтай танилцахаар ОУАЭХА-ийн шинжээчид хүрэлцэн ирээд байгаа гэжээ.

Иран улсын өмнөд хэсэгт орших тус станц нь өнөөдрийн байдлаар бүрэн ажиллагаатай байгаа Ираны цорын ганц цөмийн цахилгаан станц юм.

ОУАЭХА-ийн шинжээчдийг Иран улсад нэвтрүүлэхээр болсон явдлыг тус агентлагийн тэргүүн Рафаэл Гросси сайшааж, үргэлжлээд агентлагийн шинжээчдийг аль болох ойрын хугацаанд Иран улсад ахин очиж, өнгөрсөн 6-р сард Америкийн бөмбөгдөлтөд өртсөн Ираны Фордо, Натанз, Ишфахан дахь цөмийн байгууламжуудад очиж, нөхцөл байдлын талаарх шалгалт явуулах шаардлагатай байгааг онцолжээ.

Гэхдээ Бушерын цөмийн цахилгаан станцид ОУАЭХА-ийн шинжээчдийг ажиллуулахыг зөвшөөрсөн явдал нь Иран болон тус байгууллагын хоорондох харилцаа, хамтын ажиллагаа бүрэн сэргэж байгааг илтгэхгүй гэдгийг хоёр тал илэрхийлээд байна. Ираны гадаад хэргийн сайд мөн Тегеран, ОУАЭХА-ийн хооронд ямарваа нэгэн албан ёсны тохиролцоонд хүрээгүй байгааг дурьдсан бол агентлагийн тэргүүний зүгээс Ираны байр суурийг сонсох хүсэлтэй байгаагаа илэрхийлжээ.

6-р сард Израил болон АНУ-ын зүгээс Ираны цөмийн байгууламжуудыг бөмбөгдсөний дараа Иран улс ОУАЭХА-тай хамтын ажиллагаагаа зогсоож, тус агентлагийн шинжээч мэргэжилтнүүд Иран улсыг орхин гарсан юм.

Хэдийгээр Их Британи, Франц, Герман улсууд Иран улсын эсрэг тогтоож байсан НҮБ-ын хоригийг дахин сэргээх байр суурьтай байгаа ч ийнхүү НҮБ-ын цөмийн эрчим хүчний хяналтын агентлагийн ажилтнууд Ираны Бушерын цөмийн цахилгаан станцид ирж ажиллаж буй явдал нь өнгөрсөн хоёр сарын хугацаанд гарсан анхны томоохон ахиц дэвшил болж байна. 

Харин шинжээч, ажиглагчдын зүгээс Иран улс дипломат харилцаанд хойшлуулах, удаашруулж сунжруулах тактик хэрэглэх хандлагатай байгааг анхааруулж байна.