НАТО-гийн бүх гишүүн орнууд ДНБ-ий 2%-ийг батлан хамгаалах салбартаа зарцуулах зорилгодоо энэ жил хүрсэн талаар пүрэв гарагт мэдэгджээ.

Дээрх мэдэгдэлд 2025 онд НАТО-гийн гишүүн орнуудын батлан хамгаалах салбарын нийлмэл зардлын хэмжээ 1.5 их наяд ам.долларт хүрсэнийг онцоллоо.

Тус цэргийн эвсэл өмнө нь 2014 онд тавьж байсан зорилгодоо ийнхүү эцэст нь хүрсэн боловч төсөв, зардлын дараагийн томоохон даваа НАТО-г хүлээж байна.

Нийт 32 гишүүнтэй Умард Атлантын Гэрээний Байгууллага өнгөрсөн 6-р сард АНУ-ын ерөнхийлөгч Д.Трампын шахалт шаардлагын дагуу ойрын арван жилийн хугацаанд батлан хамгаалахын зардлаа одоо байгаа хэмжээнээс хоёр дахин нэмэгдүүлэхээр тохиролцсон. 

Тодруулбал, Д.Трамп НАТО-гийн бүх гишүүн орнуудыг батлан хамгаалах, аюулгүй байдлын салбартаа ДНБ-ийхээ 5%-ийг төсөвлөж зарцуулахыг шаардсан бөгөөд үүнээс 3.5%-ийг нь үндсэн батлан хамгаалах салбартаа, 1.5%-ийг нь батлан хамгаалах салбартай холбоотой гүүр, зам зэрэг дэд бүтэц, кибер аюулгүй байдлын салбаруудад зарцуулахаар болоод байгаа билээ. 

Анх 2014 онд тавьж байсан зорилгодоо 11 жилийн дараа хүрсэн НАТО-гийн хувьд хоёр дахин нэмэгдүүлсэн шинэ зорилгодоо хүрч чадах эсэх нь эргэлзээ төрүүлж, гишүүн орнуудын хувьд маш хэцүү даалгавар болж байгаа юм.

Гэхдээ удирдагчдын зүгээс Европын орнуудыг дээрх амлалтаа биелүүлэн, аюулгүй байдлаа бэхжүүлж, Оросыг тогтоон барих хүчин чадалтай байхыг шаардаж байгаагаас гадна барууны олон улс орон, тагнуулын байгууллагуудын зүгээс Украины дайн зогссоны дараа 3-5 жилийн дотор Оросыг НАТО-гийн орнууд руу дайрна хэмээн анхааруулаад байна. Харин Вашингтоны хувьд Европын аюулгүй байдлын үүрэг хариуцлагыг Европын улс орнуудад даалгаж, Пентагоны зүгээс Хятадад түлхүү анхаарлаа хандуулахыг голчилж эхлээд байна.

ДНБ-ий 5%-ийг батлан хамгаалах, аюулгүй байдлын салбарт төсөвлөх зорилгод хүрэх нь зарим НАТО-гийн гишүүн орнуудын хувьд хэцүү даалгавар бол Оростой ойр, хөрш зэргэлдээ оршдог Польш, Эстони, Латви, Литва зэрэг улсууд ойрын хэдхэн жилийн дотор дээрх зорилгод хүрэхэд ойрхон байна. Польш улсын хувьд энэ жил батлан хамгаалах салбартаа ДНБ-ий 4.48%-ийг зарцуулснаараа НАТО-гийн гишүүн орнуудыг тэргүүлжээ.