ХБНГУ-ын Канцлер Фридрих Мерц “ОХУ-Украины удирдагчдын уулзалт явагдахгүй” гэв. Тэрээр пүрэв гарагт Франц улсад айлчилж, тус улсын Ерөнхийлөгч Э.Макроны Форт де Брегансон дахь зуны ордонд уулзах үеэрээ “АНУ, ОХУ-ын Ерөнхийлөгч нар, мөн өнгөрсөн долоо хоногт Ерөнхийлөгч Д.Трамптай Вашингтонд хүрсэн бидний тохиролцооноос ялгаатай нь Путин, Зеленский нарын уулзалт болохгүй гэдэг нь тодорхой байна” хэмээн сэтгүүлчдэд мэдэгджээ.

Өнгөрсөн долоо хоногийн сүүлээр ОХУ-ын Гадаад хэргийн сайд С.Лавров Путин, Зеленский нарын уулзалтаар хэлэлцэх асуудлууд тодорхой болоогүй тул зохион байгуулагдахгүй гэж хэлснээс дайныг өндөрлүүлж, энхийн хэлэлцээр байгуулах ОХУ-Украины дээд хэмжээний уулзалт явагдах эсэх нь тодорхойгүй болоод байна.

Хэрвээ уулзалт зохиогдохгүй бол “сөрөг үр дагавар” хүлээж байгаа ба “маш хатуу, шийдэмгий” арга хэмжээ авах болно гэж АНУ-ын Ерөнхийлөгч Д.Трамп энэ долоо хоногт мэдэгдсэн юм. Мөн тэрээр нөхцөл байдлыг нэгээс хоёр долоо хоногийн хугацаанд харна гэдгээ илэрхийлсэн.

Тэгвэл ХБНГУ-ын Канцлер Ф.Мерц Трампын засаг захиргааны хүчин чармайлтаас үл хамаарч Путин, Зеленский нарын уулзалт болохгүй гэдгийг шууд мэдэгдсэн анхны Европын удирдагч боллоо.

Европын удирдагчид анхнаасаа Трамп, Путины уулзалт, яриа хэлэлцээнд далдуур эргэлзээтэй хандаж байсан бол Фридрих Мерц Трампын хүчин чармайлтад эргэлзэж байгаагаа ийнхүү нээлттэй илэрхийллээ.