Нийслэлийн Сонгинохайрхан дүүргийн 20 дугаар хороонд өчигдөр авто замын зорчих хэсэгт 2 машин мөргөлдсөний улмаас 1 хүн машины төмөр хийцэд хавчуулагджээ. Замын цагдаагаас ирсэн уг дуудлагыг 11-р сарын 3-ны 12:04 цагт аврагчид хүлээн авсан байна. Нийслэлийн Аврах ангийн алба хаагчдыг очиход “Bongo-3” загварын бага оврын ачааны машин, иргэн Ж-гийн “Vellfire” загварын суудлын машинтай мөргөлдсөн байв. Уг ослын үеэр ачааны машинд зорчиж явсан, нийслэлийн Сонгинохайрхан дүүргийн 26 дугаар хорооны иргэн Б /18 настай, эрэгтэй/-ын 2 хөл машины бүхээгт хавчуулагдан гэмтсэн, хөлөө гаргаж авч чадахгүй байсан аж. Аврагчид түүнийг эсэн мэнд гаргаж, Яаралтай тусламжийн төвд шилжүүлэн өгсөн байна.