22 жилийн турш эхнэрээ зодож, гэр бүлийн хүчирхийлэл үйлдсэн хэрэгт холбогдоод буй нийслэлийн ИТХ-ын төлөөлөгч Б.Эрдэнэсүхийг цагдан хорих эсэх шүүх хурал Дүүргийн эрүү, иргэний хэргийн хялбар ажиллагааны анхан шатны тойргийн шүүхэд 11-р сарын 27-нд болж, түүнийг 30 хоног цагдан хорихоор шийдвэрлэсэн. Энэ тухай Дүүргийн эрүү, иргэний хэргийн хялбар ажиллагааны анхан шатны тойргийн шүүхийн шүүгч Б.Батболор мэдээлэл өглөө. “Нийслэлийн Прокурорын газар яллагдагч Б.Эрдэнэсүхийг цагдан хорих саналыг тус шүүхэд ирүүлснийг 11 дүгээр сарын 25-нд хүлээн авч, 11 дүгээр сарын 27-нд хянан хэлэлцэв.
Шүүх хэргийн материалд цугларсан нотлох баримтууд, шүүхийн хэлэлцүүлэгт гаргасан прокурорын санал, яллагдагчийн өмгөөлөгчийн тайлбар, хавтаст хэрэгт авагдсан баримт, яллагдагчийн хувийн байдал зэрэгтэй танилцаад, яллагдагч Б.Эрдэнэсүхэд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.4 дэх заалтад заасан “Урьд нь авсан таслан сэргийлэх арга хэмжээг зөрчсөн…” гэх үндэслэлээр яллагдагчаар цагдан хорих тухай прокурорын санал үндэслэлтэй байна гэж үзлээ.
Иймд яллагдагч Б.Эрдэнэсүхэд цагдан хорих таслан сэргийлэх арга хэмжээ авах тухай прокурорын саналыг хүлээн авч, хангаж шийдвэрлэв” гэв.