<p>А, Б нар 2009 онд гэрлэлтээ бүртгүүлж, 2011 онд хүүтэй болжээ. Гэвч тэд өнөө жил салсан байна. А гэрлэлтээ цуцлуулах, хүүхдийн асрамж, тэтгэлэг тогтоолгох, дундын эд хөрөнгөөс ногдох хэсгийг гаргуулахаар Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүхэд хандсан аж. </p> <p>Учир нь нөхөр нь өөрийн өмчлөлд бүртгэлтэй байсан үл хөдлөх эд хөрөнгийг &#8220;Гэр бүлийн гишүүд хамтран өмчлөх дундын хөрөнгө биш, зөвхөн минийх. Энэ хөрөнгийг бий болгоход эхнэр мөнгө оруулаагүй&#8221; хэмээн маргасан байна. Үүгээр зогсохгүй Б тэрхүү 3 үл хөдлөх хөрөнгөө салж буй эхнэр, хүүхэдтэйгээ хуваалцахгүйн тулд бусдад бэлэглэлийн гэрээгээр шилжүүлжээ. Ингэхдээ гэр бүлийн насанд хүрсэн гишүүн болох А-ийн зөвшөөрлийг аваагүй аж. </p> <p>Б-гийн нэр дээр 3 үл хөдлөх хөрөнгө бүртгэлтэй, тэд нь бүгд өмчлөх эрхийн гэрчилгээтэй аж. Б уг үл хөдлөх хөрөнгүүдийг өөрөө бий болгосон, заримыг нь төрсөн эцэг, эх, дүү нь өгсөн гэж шүүхэд тайлбарлажээ. Тухайн хөрөнгүүд нь А, Б нарыг гэрлэсэн, хамт амьдарч байх хугацаанд бий болсон юм байна.</p> <blockquote class="wp-block-quote is-layout-flow wp-block-quote-is-layout-flow"> <p>Гэр бүлийн гишүүд гэрлэснээс хойш хамтран амьдарсан хугацаанд бий болсон хөрөнгийг орлого олсон эсэхээс үл хамааран, хамтран өмчлөх эрхтэй</p> </blockquote> <p>Эхнэр А-гийнх нь нэхэмжлэлийг шүүх 2025.09.18-нд хэлэлцээд, Б-гийн нэр дээрх хөрөнгүүдийг гэр бүлийн гишүүдийн хамтран өмчлөх дундын өмч гэж үзэв. Учир нь Иргэний хуулийн 126.4-т &#8220;Гэр бүлийн гишүүд гэрлэснээс хойш хамтран амьдарсан хугацаанд бий болсон хөрөнгийг орлого олсон эсэхээс үл хамааран, хамтран өмчлөх эрхтэй&#8221; гэж заажээ. Б өөрийн нэр дээрх ямар ч хөрөнгийг бусдад бэлэглэх, зарахдаа А-гаас бичгээр зөвшөөрөл авч, нотариатаар гэрчлүүлэх ёстой байсан аж. Гэвч тэрээр дундын өмчийг бусдад дур мэдэн бэлэглэж, хууль зөрчжээ. </p> <p>Гэсэн ч А уг эд хөрөнгөөс өөрт ногдох хэсгийг мөнгөөр тооцож гаргуулах эрхтэй гэж шүүх үзлээ. Тиймээс шүүх Б-ийн бусдад шилжүүлсэн үл хөдлөх хөрөнгийн үнээс эхнэр, хүүдээ ногдох хэсгийг төгрөгөөр тооцон гаргаж өгөхийг Б-д даалгасан гэж Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүхийн шүүгч Д.Мөнхцэцэг мэдээллээ.</p>