Шинэ жилийн баяр дөхсөнтэй холбоотойгоор архи, согтууруулах ундаа хэтрүүлэн хэрэглэсэн иргэд нийтийн тээврийн үйлчилгээнд хүндрэл учруулж, бусад зорчигчдод саад болох нь нэмэгдсээр байна. Өчигдөр /2025.12.17/ согтуу иргэд автобусанд бөөлжиж, бие засан, нийтийн тээврийн үйлчилгээг түр саатууллаа. Ийм 6 удаагийн зөрчлийг Нийтийн тээврийн бодлогын газар бүртгэжээ.

Иймд Нийтийн тээврийн бодлогын газраас иргэдийг нийтийн тээврээр соёлтой үйлчлүүлж, бусад зорчигчид хүндэтгэлтэй хандахыг уриаллаа.

Иргэдийн буруутай үйлдлээс болж, хэн хохирох вэ?

• Согтуу хүнийг автобуснаас шууд буулган орхиж болдоггүй. Учир нь өөрийгөө хянах боломжгүй хүн осгож хөлдөх, эд эрхтэн нь гэмтэх аюултай учир цагдаагийн байгууллагад дуудлага өгнө.
• Цагдаагийн байгууллага түргэн тусламж дуудан, уг хүнийг эрүүл мэндийн үзлэгт хамруулан, эрүүлжүүлэх боломжтой эсэхийг тогтооно.
• Хуульд заасан энэ процесс дууссаны дараа тухайн тээврийн хэрэгсэл замын хөдөлгөөнд оролцох боломжтой болдог.
• Авто замын хөдөлгөөний ачааллаас хамаарч, 2-3 цаг автобус саатаж, зорчигчид хохирдог.