Монгол Улсад генийн оношилгоо, эмчилгээг хөгжүүлэх зорилгоор ЭМЯ, ХСҮТ, “АстраЗенека”, “Монос трейд” компани хамтран 3 жилийн хугацаатай төсөл хэрэгжүүлэхээр боллоо. Уг төслийн хүрээнд “АстраЗенека” компани 3 жилийн хугацаанд 1170 өвчтөнг оношилгооны урвалжаар үнэ төлбөргүй хангаж, олапариб эмчилгээнд хөнгөлттэй үнээр хамруулах юм. Жилд 390 хүнд оношилгоо шинжилгээ хийж, 144 хүнийг хөнгөлөлттэй үнээр эмчилнэ.
Хөх болон өндгөвчний хавдартай өвчтөнд уг шинжилгээг хийхэд 10-15, нойр булчирхайн хавдрын үед 5 хувьд нь уг генийн мутац илэрдэг байна.
Манай улс энэ оны нэгдүгээр сард өндгөвч, хөх, нойр булчирхайн хорт хавдраас BRCA ген илрүүлэх боломжтой NGS технологийн машиныг Хавдар судлалын үндэсний төвд суурилуулсан юм. NGS технологийн тусламжтайгаар хавдрын генийн мутацыг илрүүлж, бай эмчилгээг илүү үр дүнтэй хийх нөхцөл бүрддэг. Ингэвэл хавар дахих, үсэрхийхээс сэргийлж болно.

Харилцан ойлголцлын санамж бичгийн хүрээнд, Хорт хавдартай өвчтөнүүдийг шинэлэг эмийн эмчилгээнд хамрагдах боломжийг нэмэгдүүлэх урт хугацааны загвартай болох, эмчилгээний стандартыг сайжруулах, молекул- генетикийн маркерийг илрүүлэх орчин үеийн лабораторийн оношилгооны аргуудыг практикт нэвтрүүлэхэд дэмжлэг үзүүлэн, эмч мэргэжилтнүүдийн мэдлэг, ур чадварыг сайжруулахад чиглэсэн арга хэмжээнүүдийг хэрэгжүүлэх юм.

Түүнчлэн төслийн хугацаанд хийгдэх оношилгоо, эмчилгээний баримт мэдээлэл, үр дүнд үндэслэн шинжлэх ухааны судалгаа хийж, үр дүнг олон улсын мэргэжлийн сэтгүүлд хэвлүүлэхэд түншүүд дэмжлэх үзүүлэхээр баталгаажуулав.