<p>УИХ дахь МАН-ын бүлэг 68 гишүүнтэй. Тус намаас байгуулсан хамтарсан Засгийн газар ХҮН, ИЗНН-ын дэмжлэгтэй. Тэдний 12 гишүүнийг нэмээд УИХ-д МАН, ХҮН, ИЗНН 80 гишүүнтэй. Ийм ирцтэйгээр Н.Учрал УИХ-ын байнгын хороод, чуулганыг хуралдуулж чадна. ХҮН, ИЗНН-ыг царайчлахгүйгээр МАН-ын бүлэг 68 гишүүнээ цуглуулахад л байнгын хороод, чуулган ямар ч асуудалгүй хуралдана. Бүх хурлаа цагтаа эхлүүлж, гишүүдийнхаа гарыг ярсхийтэл өргүүлэн, хууль баталж бас чадна. </p> <p>Гэвч чаддаггүй ээ. Н.Учралын чадал хүрдэггүй ээ. Чадал нь хүрэхгүй байгааг олон нийт харж байхад, парламентын ирц бүрдэхгүй байгааг АН-ын бүлэг рүү бухаж сууна. &#8220;Ичсэн хүн хүн ална&#8221; гэж үүнийг хэлдэг юм л даа. </p> <blockquote class="wp-block-quote is-layout-flow wp-block-quote-is-layout-flow"> <p>Гишүүдээ хуралд нь суулгаж чадахгүй яваа буруугаа тэр өөрөөс биш өрөөлөөс хайж, ойрыг барахгүй, хол явахгүй улстөрч гэдгээ харуулав</p> </blockquote> <p>Д.Амарбаясгалан, Л.Оюун-Эрдэнэ тэргүүтэй гишүүдээ ажилд нь ирүүлж, хуралд нь суулгаж чадахгүй яваа буруугаа тэр өөрөөс биш өрөөлөөс хайж, ойрыг барахгүй, хол явахгүй улстөрч гэдгээ харуулав. </p> <p>УИХ-ын хаврын чуулган 3-р сарын 16-нд нээлтээ хийсэн. Түүнээс хойш хоёр дахь 7 хоногтоо хуралдаж чадсангүй. Чуулганаа хуралдуулж чадалгүй Н.Учрал гацав. Өөрөө огцорч чадахгүй Н.Учрал бүүр ч гацав. 2 сайдаа сольж чадалгүй Г.Занданшатар гацав. МАН-ын бүлгээ цуглуулж чадалгүй Ж.Батжаргал гацав. Бүлгийнхээ хурлыг ч хийж чадахаа байв. Бүгд гацав. </p> <p>Энэ гацаанаас гарах арга хайхаар УИХ дахь МАН-ын бүлгийн Н.Учрал, Г.Занданшатар талынхан өнөөдөр 14:00 цагаас хуралдаж байна. </p>