<p>Өнөөдөр УИХ-ын Ёс зүйн дэд хорооны хурлаар М.Нарантуяа-Наратай холбоотой гомдлыг хэлэлцэх ёстой байсан юм. Гэвч дэд хорооны 8 гишүүнээс 2 нь л ирснээр дэд хорооны ирц бүрдсэнгүй. Хурал тодорхойгүй хугацаагаар хойшиллоо.</p> <blockquote class="wp-block-quote is-layout-flow wp-block-quote-is-layout-flow"> <p>УИХ-ын гишүүний ёс зүйтэй холбоотой гомдол гарсан тохиолдолд уг дэд хороо хуралддаг. Тус хороог УИХ-ын гишүүн Б.Хэрлэн ахалдаг. Чуулган завсарлах хугацаанд уг хороонд М.Нарантуяа-Нара гишүүнтэй холбогдох 48 гомдол иржээ. Дээрх 48 гомдлыг төрөлжүүлэхэд 5 төрөлд багцлагдсан байна.</p> </blockquote> <p>Тухайлбал иргэдийг төлөөлөх үүрэгтэй УИХ-ын гишүүн иргэдийг дайрч давшилж доромжилсон, олон нийтийн сүлжээгээр бусдыг гүтгэн доромжилсон, өсвөр үе залуучуудад буруу үлгэр дууриал үзүүлсэн, УИХ-ын гишүүний албан тушаалаа урвуулан ашиглаж бараа бүтээгдэхүүн сурталчилсан зэрэг үндэслэлээр зарим иргэн М.Нарантуяа-Нара гишүүнд гомджээ.</p> <p>Нара гишүүнтэй холбоотой гомдол Ёс зүйн дэд хороонд анх удаа ирж байгаа юм биш. Намрын чуулганы хугацаанд ч олон гомдол ирж, тус хороог ахалж байсан Б.Баярбаатар гишүүн хариуцлагын асуудал ярьж байсан ч эцэстээ М.Нарантуяа-Нара гишүүнд загнуулаад дууссан билээ. Хуулиар олгосон боломжоор бол ёс зүйн зөрчил гаргасан УИХ-ын гишүүнээр уучлал гуйлгах, сануулга өгөх, цалинг нь 6 сараар 20 хувиар бууруулах зэрэг арга хэмжээ авах боломж бий. Гэхдээ М.Нарантуяа-Нараг уучлал гуйлгах гээд Б.Баярбаатар гишүүн тэргүүтэй өмнөх Ёс зүйн дэд хорооны гишүүд бараагүй.</p> <p>Тэгвэл Б.Хэрлэн даргатай Ёс зүйн дэд хороо түүний зөрчлийг ч хэлэлцэж чадахгүй гацаанд орлоо. Магадгүй М.Нарантуяа-Нарад хариуцлага ярихаас тус хорооны гишүүд халгасан байхыг үгүйсгэх аргагүй. </p>