49 настай, эрэгтэй Ц.С нэгэн аймгийн нутаг дэвсгэрээс мансууруулах үйлчилгээтэй өвс түүж, гэртээ хадгалж байгаад ЦЕГ-ын Хар тамхитай тэмцэх албанд баригджээ. Тэр нь НҮБ-ын 1971 оны Сэтгэцэд нөлөөлөх бодисын тухай конвенцын II жагсаалтад багтсан, дельта 9 тетрагидроканнабинолын агууламжтай сэтгэцэд нөлөөтэй ургамал аж.

Энэ хэрэгт нийслэлийн Прокурорын газар Эрүүгийн хуулийн 20.7 дугаар зүйлийн 1 дэх хэсэг (Хориглосон сэтгэцэд нөлөөт бодсыг худалдах зорилгогүйгээр хууль бусаар олж авсан, хадгалсан)-т зааснаар яллах дүгнэлт үйлдэж, шүүхэд шилжүүлсэн байна.

Шүүх уг хэргийг хэлэлцээд, түүнд 1 жил 6 сар хорих ял оногдуулав. Өмнө нь түүнд оноосон хорих ялаас эдлээгүй үлдсэн ялыг нэмжээ. Ингээд түүнд нийт 3 жил 10 сар 17 хоног хорих ял оноож, ялыг нээлттэй хорих байгууллагад эдлүүлэхээр шийдвэрлэв. Учир нь тэр өмнө нь гэмт хэрэгт холбогдон, хорих ял эдэлж байгаад, хугацаанаасаа өмнө суллагджээ.