Хятад улс өндөр хүчин чадалтай соронз, батлан хамгаалах болон өндөр технологийн үйлдвэрлэлд ашиглагддаг зарим газрын ховор элементийн экспортод тавьсан хязгаарлалтаа үргэлжлүүлэхээр боллоо. Ингэснээр Японы үйлдвэрүүдийн нийлүүлэлтийн асуудал хурцдаж байна. Энэ нь бүс нутгийн технологийн салбарын томоохон эрсдэл хэвээр байж газрын ховор элементийн талаарх маргаан хурцдах шинжтэй боллоо хэмээн Ройтерс мэдээллээ.

Хятад улс дэлхийн газрын ховор элементийн олборлолт, боловсруулалтын томоохон хэсгийг дангаараа хянадаг. Эдгээр металлыг цахилгаан автомашин, салхин турбин, ухаалаг гар утас, компьютерийн чип, цэргийн тоног төхөөрөмж зэрэг өндөр технологийн бүтээгдэхүүн үйлдвэрлэхэд ашигладаг.

Сүүлийн саруудад Бээжин зарим төрлийн ховор металл болон өндөр хүчин чадалтай соронзны экспортод илүү хатуу хяналт тавьж эхэлсэн нь Япон төдийгүй Өмнөд Солонгос, Европ, АНУ-ын үйлдвэрлэгчдэд дарамт болж байна.

Японы автомашин болон электроникийн салбар Хятадаас нийлүүлдэг түүхий эдээс ихээхэн хамааралтай учир нийлүүлэлт тасалдах эрсдэл үүсээд байгаа юм. Ялангуяа Toyota, Honda зэрэг үйлдвэрлэгчид цахилгаан автомашины мотор болон батерейн үйлдвэрлэлдээ эдгээр материалыг өргөн ашигладаг.

Шинжээчдийн үзэж буйгаар энэхүү асуудал нь зөвхөн худалдааны маргаан биш, харин технологийн болон геополитикийн өрсөлдөөний нэг хэсэг болж хувирчээ. Үүний улмаас Япон улс Австрали, Канад зэрэг орноос ховор металл нийлүүлэх шинэ эх үүсвэр хайж, Хятадаас хараат байдлаа бууруулах бодлого хэрэгжүүлж байна.