Хиймэл оюуны хөгжлийн өрсөлдөөн зөвхөн шинэ загвар бүтээхээс гадна түүнийг ажиллуулах асар их хүчин чадалтай дата төв, өндөр үзүүлэлттэй чип, цахилгаан эрчим хүчний дэд бүтцийг байгуулах шатанд шилжээд байна. Энэ хүрээнд NVIDIA, Microsoft, Amazon, Alphabet зэрэг технологийн компаниуд 2026 онд хиймэл оюуны дата төвүүдийг өргөтгөхөд хэдэн зуун тэрбум ам.долларын хөрөнгө оруулахаар төлөвлөжээ. Шинжээчдийн тооцоолсноор томоохон үүлэн үйлчилгээ үзүүлэгчдийн AI дэд бүтцийн нийт хөрөнгө оруулалт энэ онд 700 тэрбум ам.долларт дөхөж, өмнөх оноос эрс өсөх төлөвтэй байна.
Үүний зэрэгцээ компаниуд зөвхөн дата төв байгуулахаас гадна өөрсдийн AI чипийг хөгжүүлэх, хөргөлтийн шинэ технологи нэвтрүүлэх, цахилгаан эрчим хүчний найдвартай эх үүсвэрийг нэмэгдүүлэхэд анхаарч байна. Харин ийм их хэмжээний хөрөнгө оруулалт нь чип, санах ойн нийлүүлэлт болон эрчим хүчний хэрэглээнд дарамт учруулж, хөрөнгө оруулагчид эдгээр зардал бодит ашиг болж хувирах эсэхийг анхааралтай ажиглаж байгаа юм.