Тайландын зүүн хойд нутгийн Мукдахан мужид 11 настай хүүгийн жолоодож явсан пикап автомашин мөргөл үйлдэж явсан буддын лам нарын цувааг дайрсны улмаас найман лам амиа алдаж, 20 гаруй хүн гэмтсэн талаар орон нутгийн албаныхан долоодугаар сарын 2-нд мэдээллээ.

Осолд өртсөн хүмүүс нь нийт 34 буддын лам, таван энгийн дагалдагчаас бүрдсэн мөргөлийн баг байсан бөгөөд Мукдахан муж дахь сүмээс хөрш Убон Ратчатхани мужийн өөр нэгэн сүмийг зорин явж байжээ. Мужийн захирагч Вораян Бунаратын мэдээлснээр таван лам ослын газарт амиа алдаж, гурван лам эмнэлэгт хүргэгдсэний дараа нас барсан байна.

Мөн 22 лам, нэг энгийн иргэн гэмтсэний дотор дөрвөн хүний биеийн байдал хүнд байгаа аж. Гэмтэгсдийг ойролцоох эмнэлгүүдэд хүргэн эмчилж байгаа бөгөөд аврах ажиллагаанд онцгой байдлын алба шуурхай ажилласан байна.

Цагдаагийн байгууллагын мэдээлснээр осол гаргасан 11 настай хүү нь тусгай хэрэгцээтэй хүүхэд бөгөөд ослын дараах цочролын улмаас одоогоор мэдүүлэг өгөх боломжгүй байгаа тул байцаалт аваагүй байна. Иймээс хэргийн нөхцөл байдал бүрэн тогтоогдоогүй бөгөөд одоогоор хэнд нэгэн эрүүгийн хэрэг үүсгээд байгаа эсэхийг эрх баригчид мэдээлээгүй байна.

Энэхүү эмгэнэлт хэрэг нь буддын шашин зонхилдог Тайландын нийгэмд гүн цочрол төрүүлээд байгаа бөгөөд ослын шалтгаан, насанд хүрээгүй хүүхэд автомашин жолоодох болсон нөхцөл байдлыг мөрдөн шалгах ажиллагаа үргэлжилж байна.