Өмнөд болон Баруун Европын хэд хэдэн оронд агаарын температур 40 хэмээс давсан хэвээр байна. Испани, Итали, Португал, Балканы орнуудад ой, хээрийн түймрийн эрсдэл өндөр хэвээр байгаа бөгөөд зарим бүс нутагт онцгой байдлын зэрэглэл тогтоожээ.
Европыг хамарсан энэ зуны хүчтэй хэт халалтын давлагаа хүний амь нас, эрчим хүч, тээвэр болон эрүүл мэндийн салбарт томоохон дарамт учруулсаар байна. Урьдчилсан тооцоогоор зөвхөн Франц, Бельги, Нидерландад зургаадугаар сарын 20-28-ны хооронд дор хаяж 3,700 илүүдэл нас баралт бүртгэгдээд байгаа бөгөөд эрх баригчид бодит тоо үүнээс өсөх магадлалтайг анхааруулжээ.
Хамгийн олон хохирол Францад бүртгэгдэж, 2,025 хүн, Бельгид 1,222 хүн, Нидерландад 480 орчим хүн халалтын улмаас нас барсан гэж урьдчилсан байдлаар тооцсон байна. Мөн Испанийн Эрүүл мэндийн хүрээлэн зургаадугаар сард 1,028 хүн хэт халалттай холбоотойгоор амиа алдсан гэж мэдээлжээ. Нас барагсдын дийлэнх нь өндөр настнууд байсан ч дунд насныхны дунд ч нас баралт мэдэгдэхүйц өссөн байна.
Хэт халалтын улмаас эрчим хүчний хэрэглээ огцом өсөж, цахилгаан дамжуулах сүлжээнд ачаалал нэмэгдсэн ч өргөн хүрээний албан ёсны цахилгаан хязгаарлалт одоогоор хэрэгжээгүй байна. Харин Франц, Испани, Итали зэрэг оронд эрчим хүчний компаниуд сүлжээний ачааллыг тогтворжуулах арга хэмжээ авч, зарим үйлдвэрийн хүчин чадлыг түр бууруулж, цахилгаан станцуудын ажиллагаанд халуун цаг агаарын нөлөө үзүүлжээ. Шинжээчид зуны оргил ачааллын үед цахилгаан тасалдах эрсдэл өндөр хэвээр байгааг анхааруулж байна.
Олон улс иргэдээ хамгаалах тусгай арга хэмжээг хэрэгжүүлж эхэлжээ. Франц улс улаан түвшний халууны сэрэмжлүүлэг зарлаж, зарим сургууль, цэцэрлэгийн үйл ажиллагааг түр зогсоосон бол Парис хот өндөр настнуудыг тогтмол эргэж шалгах хөтөлбөрөө идэвхжүүлж, сэрүүцүүлэх олон нийтийн байруудыг нээжээ. Испанийн Барселона хот 500 гаруй “уур амьсгалын хоргодох байр” ажиллуулж, Италийн хэд хэдэн мужид өдрийн хамгийн халуун цагт гадаа ажиллахыг түр хязгаарласан байна. Бельгийн Засгийн газар ирээдүйн халалтын давлагаанд бэлтгэх үндэсний төлөвлөгөөг шинэчлэх үүрэг өгөөд байгаа бол ДЭМБ Европын орнуудыг халалтын эрүүл мэндийн бэлэн байдлаа эрчимжүүлэхийг уриалжээ.