Оросын арми долдугаар сарын 19-ний шөнө Украинд энэ оны хамгийн хүчтэй агаарын довтолгоо хийлээ. Украины Ерөнхийлөгч Володимир Зеленський Орос нийт 41 пуужин, 125 дрон ашиглан довтолсон бөгөөд гол бай нь нийслэл Киев байсан гэж мэдэгдэв.
Украины Агаарын цэргийн хүч 18 пуужин, 108 дроныг замаас нь устгасан ч зарим баллистик пуужин хамгаалалтыг нэвтэрч, Киев хотын хэд хэдэн дүүрэгт орон сууц, агуулах, супермаркет, оюутны дотуур байр зэрэг иргэний барилгууд сүйджээ. Урьдчилсан мэдээллээр дор хаяж нэг хүн амиа алдаж, 16 хүн шархадсан бөгөөд тэдний гурав нь хүнд байдалтай байна. Аврагчид нурсан барилгуудын нуранги дороос иргэдийг хайх ажиллагааг үргэлжлүүлж байна.
Зеленський энэхүү халдлагын дараа Украинд Patriot зэрэг баллистик пуужин сөнөөх агаарын довтолгооноос хамгаалах систем нэн шаардлагатай байгааг дахин онцоллоо. Тэрээр АНУ-тай Patriot пуужингийн үйлдвэрлэлийг Украинд эхлүүлэх талаар улс төрийн тохиролцоонд хүрсэн бөгөөд үйлдвэрлэл энэ оны сүүлээр эхлэх боломжтой гэж мэдэгдсэн байна.
Харин Оросын Батлан хамгаалах яам уг ажиллагаагаа Украины цэргийн үйлдвэр, дроны эд анги үйлдвэрлэдэг байгууламж болон логистикийн объектуудыг онилсон “өндөр нарийвчлалтай цохилт” байсан хэмээн тайлбарлажээ. Үүний зэрэгцээ Украин ч Оросын нутаг дахь логистикийн төвүүд болон газрын тосны байгууламжууд руу дроноор цохилт өгсөн талаар хоёр тал мэдээлсэн бөгөөд мөргөлдөөн хоёр талдаа улам эрчимжиж буйг харуулж байна.