<h3 class="wp-block-heading"></h3> <p>Италийн Сицили аралд гарсан ой хээрийн түймэр оливын тариалан эрхлэгчдэд асар их хохирол учруулжээ. Azienda Agricola Barbaccia (AAB) фермийн төлөөлөгч Барбачча хэлэхдээ, түймрээс хамгаалахын тулд галын зурвас татах зэрэг бүхий л урьдчилан сэргийлэх арга хэмжээг авсан ч хүчтэй салхины улмаас галын тархалтыг зогсоож чадаагүй гэж ярьсан байна.</p> <p>Түүний хэлснээр, 6–8 метрийн өргөнтэй галын хамгаалалтын зурвасыг дөл даван гарч, оливын төгөл бүхэлдээ шатжээ.</p> <blockquote class="wp-block-quote is-layout-flow wp-block-quote-is-layout-flow"> <p>&#8220;Бид юу ч аварч чадсангүй. Энэ жилийн ургацаа төдийгүй олон арван жилийн турш ургуулсан моддоо алдлаа. Ингэснээр зөвхөн энэ жилийн биш, ирээдүйн Сицилийн онгон оливын тосны үйлдвэрлэл ч алдагдаж байна&#8221; гэж Барбачча хэлэв.</p> </blockquote> <p>Түймэр долдугаар сарын 17-нд дэгдэж, Сицилийн бүх мужид зэрэг шахам олон арван гал гарсан байна. Ялангуяа Годрано хотын ойролцоо гал орон сууцнуудад ойртож, хотын захирагч Иргэний хамгаалалтын алба болон хөрш Мизилмери хотоос нэмэлт хүч дайчилжээ.</p> <p>Италийн ANSA агентлагийн мэдээлснээр, 40 хэмээс давсан халуун, хуурайшсан ургамал түймрийг богино хугацаанд асар хурдтай тархах нөхцөл бүрдүүлсэн байна.</p> <p>Мягмар гарагт Сицили даяар Иргэний хамгаалалтын алба, гал сөнөөгчид болон Ойн хамгаалалтын корпусын оролцоотой 100 гаруй удаагийн гал унтраах ажиллагаа явагдсан ч хэт халуун, хүчтэй салхины улмаас түймрийг бүрэн хяналтдаа авахад хүндрэлтэй хэвээр байгааг Барбачча онцолжээ.</p> <p>Энэхүү түймэр нь зөвхөн нэг улирлын ургац бус, олон арван жилийн турш ургуулсан оливын моддыг устгасан тул Сицилийн алдарт нэмэлт онгон оливын тосны үйлдвэрлэлд урт хугацааны сөрөг нөлөө үзүүлэхээр байна.</p>