Английн Премьер лигийн аварга Арсенал Бразилын жигүүрийн довтлогч Винисиус Жуниорыг энэ зуны шилжилтээр авах боломжийг судалж байгаа ч Реал Мадридын ерөнхий дасгалжуулагч Жозе Моуриньо клубын удирдлагад түүнийг ямар ч нөхцөлд зарахгүй байх байр сууриа илэрхийлжээ.
The Athletic-ийн сэтгүүлч Дэвид Орнштейний мэдээлснээр Арсенал Винисиус шинэ гэрээний асуудлаар Реал Мадридтай тохиролцоонд хүрэхгүй тохиолдолд түүнийг авах боломжийг судалж эхэлсэн байна.
Одоогоор хоёр клубын хооронд албан ёсны хэлэлцээ эхлээгүй байгаа ч Арсеналын удирдлагын бүх түвшинд энэ шилжилтийг дэмжиж байгаа аж. Лондонгийн клуб Челсид Морган Рожерсыг алдсаны дараа довтолгооны шугамаа хүчирхэгжүүлэхээр ажиллаж байна.
26 настай Винисиус Жуниор Реал Мадридад найман улирал тоглосны дараа гэрээнийхээ сүүлийн нэг жилд оржээ. Түүний шинэ гэрээний хэлэлцээ одоогоор эцэслэн шийдэгдээгүй байгаа бөгөөд энэ нь Арсеналын сонирхлыг улам нэмэгдүүлж байгаа юм.
Гэсэн хэдий ч Жозе Моуриньо Винисиусыг багийн ирээдүйн гол тоглогчдын нэг гэж үзэж байгаа бөгөөд түүнийг энэ зун багаа орхих ёсгүй гэсэн байр сууриа клубын удирдлагад тодорхой илэрхийлсэн байна. Одоогоор Реал Мадрид Бразил жигүүрийн тоглогчийг худалдах төлөвлөгөө байхгүй бөгөөд шинэ гэрээ байгуулах хэлэлцээ үргэлжилж байна.