Мароккотой хиллэдэг Испанийн Сеута анклав руу долдугаар сарын 30-нд олон зуун цагаач хил нэвтрэхийг завджээ. Зарим нь далайгаар сэлж, зарим нь хуурай газраар хил даван Европын холбооны нутагт нэвтрэхийг оролдсон байна.
Бичлэгт цагаачид Мароккогийн эргээс усанд сэлэх, хийлдэг дугуй ашиглан эрэгт хүрэх, мөн хуурай газрын шалган нэвтрүүлэх цэгийн хаалгыг нэвтлэн хот руу гүйж буй нь харагдсан байна. Үүний дараа Испанийн цэрэг, хууль сахиулах байгууллагынхан эрэг болон авто замуудад хамгаалалтаа чангатгаж, Иргэний хамгаалалтын алба болон тэнгисийн эргүүлийн хөлгүүд ойролцоох усанд эргүүл хийжээ.
Мароккогоос ирсэн нэгэн цагаач өглөө бүлгээрээ хил давсан бөгөөд Мароккогийн цагдаагийн хамгаалалтын ханыг давсны дараа ойролцоогоор 200 метр сэлж Сеутад хүрсэн гэж ярьжээ.
Сеута болон Мелилья нь Европын холбооны Африк тив дэх цорын ганц хуурай газрын хилүүд бөгөөд Европ руу хүрэхийг зорьсон цагаачдын хууль бус нэвтрэх оролдлого эдгээр бүсэд тогтмол нэмэгддэг юм.