<h3 class="wp-block-heading"></h3> <p>Японы долоон гишүүнтэй &#8220;Psychic Fever&#8221; хамтлаг хөгжмөөрөө улс орон, соёлын хил хязгаарыг даван холбохыг зорьдог тухайгаа Их Британийн Лондон хотод Reuters агентлагт өгсөн ярилцлагадаа онцоллоо.</p> <p>Хамтлагийн хамгийн сүүлийн &#8220;Different&#8221; цомог нь афробит болон R&amp;B урсгалыг хослуулсан бөгөөд аяллынхаа туршлагаас санаа авч, англи болон япон хэлээр бүтээсэн дуугуудаараа олон улсын сонсогчдод хүрэхийг зорьжээ.</p> <p>&#8220;Psychic Fever&#8221; хамтлаг &#8220;Temperature&#8221;, &#8220;Just Like Dat&#8221; зэрэг дуугаараа олон улсад танигдсан бөгөөд &#8220;Just Like Dat&#8221; дуу нь TikTok-т цахим тренд болж, бүжгийн сорилтыг дэлгэрүүлсэн юм.</p> <p>Тэд үүнээс хойш Азийн томоохон хөгжмийн наадмуудад оролцож, АНУ-ын зургаан хотыг хамарсан аялан тоглолтоо хийжээ. Харин наймдугаар сарын 2-нд Лондон хотод болсон фенүүдтэйгээ уулзах арга хэмжээнд 100 орчим хүн оролцсон байна.</p> <p>Хамтлагийн гишүүн Жимми хэлэхдээ, &#8220;Psychic Fever&#8221;-ийн онцлог нь нэг гишүүнээ төвд тавьдаггүй, харин гишүүн бүр өөрийн гэсэн давуу талтай байдагт оршдог гэв.</p> <blockquote class="wp-block-quote is-layout-flow wp-block-quote-is-layout-flow"> <p>&#8220;Олон хамтлаг гол дуучин эсвэл төв гишүүнтэй байдаг. Харин манай хамтлагт хүн бүр өөрийн давуу талтай. Тэр бүхнийг нэгтгэхэд бид юу ч хийж чадна гэж боддог&#8221; хэмээн тэр ярьжээ.</p> </blockquote> <p>Хамтлагийн гишүүн Кокоро Кохацү ирээдүйд Billboard Global жагсаалтыг тэргүүлж, Лондонгийн Уэмбли цэнгэлдэх хүрээлэн зэрэг томоохон тайзуудад тоглолт хийхийг мөрөөддөгөө хэлсэн байна.</p> <p>Алдар нэр өсөн нэмэгдэж буй үед хэрхэн даруу байдлаа хадгалдаг талаар асуухад Жимми:</p> <blockquote class="wp-block-quote is-layout-flow wp-block-quote-is-layout-flow"> <p>&#8220;Хэчнээн алдартай болсон ч бид даруу байж, хийх ёстой ажлаа л хийх хэрэгтэй. Энэ бол Японы соёлд гүн шингэсэн үнэт зүйл&#8221; хэмээн онцолжээ.</p> </blockquote> <p></p>